Ասում ենք` եկեք ստորագրենք համաձայնեցված կետերով պայմանագիրը ու շարունակենք այլ հարցերի վերաբերյալ քննարկումը, Ադրբեջանն ասում է` չէ. Փաշինյան

Խաղաղության պայմանագրում կա 13 հոդված, որ պաշտոնապես համաձայնեցված է, ԱԺ-ում հայտարարեց վարչապետ Նիկոլ Փաշինյանը:

«Նախաբանն ամբողջությամբ համաձայնեցված է, թղթի վերնագիրն ամբողջությամբ համաձայնեցված է, ևս  երեք հոդված մասնակի է համաձայնեցված, կան մասեր, որոնք համաձայնեցված չեն: Կա ևս մեկ հոդված, որն ընդհանրապես համաձայնեցված չէ»,- ասաց նա:

Փաշինյանի խոսքով` այն, ինչը համաձայնեցված է, անդրադառնում է երկու պետությունների հարաբերության հիմնարար սկզբունքներին:

Փաշինյանը նշեց, որ մենք ասում ենք՝ եկեք հիմա սա ստորագրենք և շարունակեք այլ հարցերի վերաբերյալ քննարկումը, որովհետև համաձայնեցված հոդված կա այս պահի նախագծում, որ ասում է՝ պայմանագրի իրականացման ընթացքի շուրջ կողմերն անընդհատ կոնսուլտացիաների մեջ են լինելու և պլյուս՝ դիվանագիտական հարաբերությունների հաստատում է ենթադրում:

Նրա խոսքով, սակայն, Ադրբեջանն ասում է` չէ, կարևոր հարցեր կան, որոնք պետք է արտահայտվեն:

«Մեր հարցը հետևյալն է` երբ որ մենք, ենթադրենք, կարևոր հարցերն արտահայտենք, էլ չեն լինելո՞ւ կարևոր հարցեր: Փաստ է, որ աշխարհում չկա այնպիսի պայմանագիր, որը բոլոր հարցերին պատասխան է տալիս։

Եթե կանխավարկածն այն լինի, որ բոլոր կարևոր հարցերը լուծենք, նոր ստորագրենք, դա նշանակում է, որ մենք երբեք չենք ստորագրի: Որովհետև միշտ կլինի ևս 4 կետ, որոնք համաձայնեցված չեն լինի»,- ասաց Փաշինյանը: