Լրահոս
Առողջապահական
10:15
12.04.24
462

Ցավ երիկամների շրջանում․ ինչով է պայմանավորված

Img default alt hy

Երիկամների շրջանում ցավը կարող է առաջանալ առողջական տարբեր խնդիրների ժամանակ:

Այդ հատվածում ցավերի առկայության դեպքում պետք է դիմել բժշկի, որ հայտնաբերվի ցավի ճիշտ պատճառը: Երիկամային ցավերը կարող են ի հայտ գալ պիելոնեֆրիտի (երիկամների վարակ), երիկամների կամ միզուղիների քարի կամ երիկամների հետ կապ չունեցող այլ խնդիրների պատճառով։

Երիկամների շրջանում ցավը (ռենալ ցավ) տեղակայվում է գոտկատեղից քիչ վերև (կողերից ներքև)՝ աջ կամ ձախ կողմում: Երիկամային ցավը կարող է տարածվել այլ շրջաններ, օրինակ՝ ճառագայթվել դեպի աճուկներ, որովայն կամ ցավի հակառակ կողմը:

Երիկամներից մեզը միզածորանով արտահոսում է ներքև և կուտակվում միզապարկում, որտեղից միզելու ընթացքում միզուկի միջոցով հեռանում է օրգանիզմից: Միզուղիների այս դատարկող (դրենաժային) ուղու ցանկացած հատվածի խնդիրը կարող է առաջացնել ցավ, օրինակ՝

քարեր,

երիկամների վարակային բորբոքում (պիելոնեֆրիտ),

այլ տեսակի երիկամային հիվանդություններ:

Մկանային ծագման մեջքի ցավերը սովորաբար տեղակայվում են գոտկատեղում, իսկ երիկամային ցավերն ավելի բարձր դիրքում են (անմիջապես կողերից ներքև) և ավելի խոր ընկած: Ի տարբերություն մկանացավերի, երիկամային ցավերը սովորաբար ուղեկցվում են ջերմությամբ, փսխումներով և միզարձակման ցավոտությամբ, որը կոչվում է դիզուրիա:

Երիկամների շրջանում ցավերը կարող են առաջանալ նաև այլ՝ արտաերիկամային պատճառներից, օրինակ՝

ողնաշարի կամ կողերի հետ կապված խնդիրներ

մկանային ցավեր,

թոքաբորբ, երբ ընդգրկված է նաև թոքամիզը (պլևրա),

փայծաղի կամ լյարդի հիվանդություններ,

միջողնային սկավառակի ճողվածք:

Երիկամային ցավն ախտորոշելիս բժիշկը կզրուցի, կզննի, որից հետո կարող է նշանակել որոշ հետազոտություններ, ինչպիսիք են՝

արյան և մեզի թեստեր,

գերձայնային հետազոտություն (սոնոգրաֆիա):

Դժվար ախտորոշվող դեպքերում բժիշկը կարող է առաջարկել նաև համակարգչային տոմոգրաֆիա (ԿՏ):

Երիկամային ցավի բուժումը կախված է առաջացման պատճառից, ցավի ուժգնությունից և հիվանդի ինքնազգացողությունից:

Մեղմ և չափավոր ցավերը կարող են մեղմանալ սովորական ցավամոքիչ դեղերով, օրինակ:

Պետք է դիմել բժշկի, երբ մեջքի ցավերն ուղեկցվում են թվարկված նշաններից մեկնումեկով՝

մեզի գույնի փոփոխություններ, արյունամիզություն կամ ցավոտ միզարձակում,

անհապաղ միզելու մշտական զգացողություն,

ջերմություն,

մեզում ավազահատիկի (երիկամային մանր քար) առկայություն,

ինքնազգացողության վատացում, փոխանցում է Aysor.am-ը։