«Հ1»-ի տնօրենի թեկնածուներին են քննարկում. «Հրապարակ»

«Հրապարակ» թերթը գրում է. «Հանրային հեռուստաընկերության գործադիր տնօրենի ժամկետի ավարտին թեև մոտ մեկ տարի կա` տնօրեն Հովհաննես Մովսիսյանն այդ պաշտոնում ընտրվել է 2020-ի նոյեմբերին, 5 տարով, սակայն արդեն քննարկումներ են սկսվել այս թեմայի շուրջ: Տնօրենի պաշտոնի հավակնորդների անուններ են շրջանառվում։

Մասնավորապես, ՔՊ-ական նախկին պատգամավոր, 2021-ից 6 տարի ժամկետով Հանրային հեռարձակողի խորհրդի անդամ նշանակված Վահագն Թևոսյանի անունը, որը լուրերի խմբագիր Լուսինե Բարսեղյանի ամուսինն է։ Մեր հարցից, թե հավակնո՞ւմ է այդ պաշտոնին, Թևոսյանն անակնկալի եկավ, վրդովվեց, թե ինքը չի կարող առաջադրվել, շահերի բախում կառաջանա` Հանրային հեռարձակողի խորհրդի անդամ է:

Երբ հիշեցրինք, որ նման տեխնիկական հարցերը լուծվող են` կարող է հրաժարական տալ և առաջադրվել, ասաց, որ տնօրենի ժամկետի ավարտին դեռ շատ կա, պետք չէ շտապել` «ինչո՞վ է այդ հարցն այդքան հրատապ»:

Ապա պատասխանեց․ «Հանրային հեռուստատեսության տնօրենն աշխատում է շատ արդյունավետ, չի բացառվում, որ հետագայում նրա պայմանագիրը նաև երկարաձգվի, առայժմ որևէ տեղ չի քննարկվում տնօրենի հնարավոր նոր թեկնածություն, ինքս բացարձակ նման մտադրություն չեմ ունեցել, որևէ տեղ նման ցանկություն չեմ հայտնել և որևէ տեղից նման առաջարկ չեմ լսել: Ինձ համար, իսկապես, անակնկալ է, որ Դուք զանգել և նման հարց եք տալիս»։

Օրենքը, հիշեցնենք, ասում է․ «Հանրային հեռուստաընկերության և հանրային ռադիոընկերության մրցույթում հաղթող ճանաչված գործադիր տնօրենները նշանակվում և ազատվում են Խորհրդի անդամների ընդհանուր թվի ձայների մեծամասնությամբ՝ մինչև 5 տարի ժամկետով»:

Առավել մանրամասն թերթի այսօրվա համարում: