Մարտի 1-ը և հունիսի 12-ը ունեն մեկ ընդհանրություն, երկու դեպքում էլ մեղավորը Փաշինյանն է. Հայկ Մամիջանյան

«Ինձ առաջարկվել էր այսօր խոսել խորհրդարանական դիվանագիտությունից, բայց շատ բարդ է խոսել մի բանի մասին, ինրը գոյություն չունի։ Էդ Փաշինյանն ա կարողանում խոսել բաներից, որոնք գոյություն չունեն»,- այս մասին Սբ․ Աննա եկեղեցու բակում ասաց ԱԺ «Պատիվ ունեմ» խմբակցության պատգամավոր Հայկ Մամիջանյանը։

Նրա համոզմամբ՝ խորհրդարանական դիվանագիտությունն ուղղված է Փաշինյանի իշխանությունը պահելուն։

«Նրանք դիվանագիտներ չեն, Փաշինյանի աթոռապահներն են։ Այն բոլոր զեկույցներն ու գործողումները, որոնք արվում են,միտված են մեկ բանի՝ գնալ աշխարհում խաբել ու ասել, որ Հայաստանում բոլորը Փաշինյանի հետ համաձայն են, որևէ խնդիր չեն տեսնում Արցախի ու Հայաստանի հողերի հանձման։ Հետո էլ խաբել, որ Հայաստանում ժողովրդավարություն է»,- ասաց նա՝ նկարագրելով այսօրվա իշխանության խորհրդարանական դիվանագիտությունը։

Մամիջանյանը նշեց, որ Մարտի 1-ը և հունիսի 12-ը ունեն մեկ, խիստ առանցքային ընդհանրություն:

«Երկու պարագայում զոհերի, մարդկային վնասների, առողջությանը պատճառված վնասների մեղավորը Նիկոլ Փաշինյանն է. Մարտի 1-ին՝ որպես ցուցարար, հունիսի 12-ին՝ որպես վարչապետի աթոռին նստած մարդ»,-հայտարարեց Մամիջանյանը։

Պատգամավորն ասաց նաև, որ «Պատիվ ունեմ» և «Հայաստան» խմբակցությունները համատեղ նախաձեռնելու են հունիսի 12-ին ոստիկանության կողմից կիրառված գործողությունները քննող ԱԺ քննիչ հանձնաժողովի ստեղծում։