Մերցի՝ վարկանիշը վերականգնելու փորձերը «նրա դեմ են շրջվում»․ Politico

Գերմանիայի կանցլեր Ֆրիդրիխ Մերցի փորձերը՝ վերականգնելու իր վարկանիշը ընտրողների հետ հանդիպումների միջոցով, հակառակ արդյունքն են տալիս և միայն խորացնում են նրա խնդիրները։ Այս մասին գրում է Politico հրատարակությունը։

Փորձելով համոզել գերմանացիներին, որ Գերմանիան ճիշտ ուղու վրա է, Մերցը հանրային միջոցառումներով շրջում է երկրով մեկ, սակայն «դա հաջողությամբ չի ուղեկցվում», ասվում է հոդվածում։ Դրա փոխարեն Մերցը միայն «բազմապատկում է սեփական խնդիրները, հաճախ իրականությունից կտրված տեսք ունի և ավելի ու ավելի է իրենից վանող այն ընտրողներին, որոնց կորցնելն իրեն թույլ տալ չի կարող»։

Մասնավորապես, հրատարակությունը հիշեցնում է Զալցվեդելում (Սաքսոնիա-Անհալթ դաշնային հող) քաղաքացիների հետ հանդիպումը, երբ Մերցը կոպիտ է պատասխանել քաղցկեղով հիվանդ մի կնոջ, ով հարցրել էր նրան, թե ինչու են առողջապահական ծախսերը կրճատվում, մինչդեռ դաշնային նախարարներն իբր ձգտում են սեփական աշխատավարձերի բարձրացմանը։ Թեև նախարարների աշխատավարձերի բարձրացման մասին կնոջ պնդումները հիմնականում կեղծ էին, Մերցի «անզգա պատասխանը» քննադատության տեղիք է տվել, նշվում է հոդվածում։

Մերցի խնդիրները ձեռնտու են աջակողմյան «Այլընտրանք Գերմանիայի համար» (ԱԳՀ) կուսակցությանը, որը հարցումների մեծ մասով առաջ է անցնում իշխող Քրիստոնեա-դեմոկրատական միությունից (ՔԴՄ) և կարող է պատմականորեն բարձր արդյունքներ գրանցել սեպտեմբերին նախկին ԳԴՀ-ի տարածքի հողերում կայանալիք տարածաշրջանային ընտրություններում։ Եվ թեև ԱԳՀ-ի հաղթանակն այս ընտրություններում դժվար թե էական ազդեցություն ունենա ՔԴՄ-ի և սոցիալ-դեմոկրատների իշխող կոալիցիայի գործերի վրա, այդ պարտության հիմնական մեղքը կբարդվի Մերցի վրա, ում համար «այս գնալով ավելի պոպուլիստական դարձող դարաշրջանում դժվար է իրեն ներկայացնել որպես ժողովրդի մարդ», գրում է պարբերականը։