Մոսկվայում ավարտվեց Պուտին-Փաշինյան-Ալիև հանդիպումը

Կրեմլում ավարտվեց Ռուսաստանի, Հայաստանի, Ադրբեջանի առաջնորդների հանդիպումը։ Ինչպես հայտնում է «Ռիա Նովոսոտի» գործակալությունը, այն տևել է 20 րոպե։

«Սպուտնիկ Արմենիա»-ի փոխանցմամբ, Վ. Պուտինը հայտնել է, որ կողմերը պայմանավորվել են մեկ շաբաթից հանդիպել փոխվարչապետների մակարդակով «չլուծված խնդիրները վերացնելու համար»։

«Սակայն, մեր կարծիքով, դրանք հաղթահարելի խոչընդոտներ են»,- ասել է ՌԴ նախագահը։

Խոսելով այսօրվա հանդիպման մասին` Պուտինը հիշեցրել է, որ կողմերին արդեն հաջողվել է արդյունքների հասնել եռակողմ ձևաչափով։ Նա օրինակ բերեց 2020 թ–ի նոյեմբերի 9-ը, որից հետո մարտական գործողությունները դադարեցին։

«Իհարկե շատ իրողություններ են այս ընթացքում տեղի ունեցել, բայց պետք է ասել, որ այս պահին ամեն ինչ տանում է դեպի կարգավորում»,– հավելել է նա։