Սլավիկ Գալստյանը պարտվեց ՕԽ-ի կիսաեզրափակչում․ կպայքարի բրոնզե մեդալի համար

Հունահռոմեական ըմբշամարտի հավաքականի անդամ, աշխարհի բրոնզե մեդալակիր, Եվրոպայի կրկնակի բրոնզե մեդալակիր 67 կգ քաշային Սլավիկ Գալստյանը պարտվել է Փարիզում անցկացվող Օլիմպիական խաղերի կիսաեզրափակչում և կպայքարի բրոնզե մեդալի համար, հայտնում է armsport-ը։

Գալստյանն իր առաջին Օլիմպիական խաղերի եզրափակիչ դուրս գալու համար գոտեմարտել է իրանցի Սաեդ Էսմաելիի հետ և 4:10 հաշվով ցավալի պարտություն կրել: Նշենք՝ առաջին մրցափուլի ավարտին Գալստյանը տուշեով հաղթանակի հնարավորություն ուներ, սակայն իրանցիների բողոքարկումից հետո մրցավարների որոշմամբ զիջեց մրցակցին:

Ավելի վաղ Գալստյանը քառորդ եզրափակչում 8:0 հաշվով հաղթել էր Օլիմպիական չեմպիոն, Աշխարհի գործող չեմպիոն կուբացի Սանչեսին, իսկ մեկնարկային գոտեմարտում ուժեղ էր գտնվել Պանամերիկյան խաղերի կրկնակի չեմպիոն, Պանամերիկյան առաջնության եռակի հաղթող, Էկվադորի ներկայացուցիչ Անդրես Ռոբերտո Մոնտանյո Արոյոյից: