Արարատահայաց ՀՀ-ն ստեղծվել է հայոց դարավոր երազանքի շուրջ և համայն հայության համախմբման արդյունքում․ «Հայոց Տուն»

«Հայոց Տուն»-ը համահայկական նախաձեռնության ուղերձը Հայաստանի Հանրապետության Անկախության օրվա առիթով․

«Սիրելի հայրենակից,

Արարատահայաց Հայաստանի Հանրապետությունը ստեղծվել է հայոց դարավոր երազանքի շուրջ և համայն հայության համախմբման արդյունքում։ Այն իրողություն է, երիտասարդ պետականություն՝ մեծ ձգտումներով, արդեն գրանցած հաջողություններով, որոնք, սակայն, մթագնվում են նաև կորուստներով։ Մենք՝ մտավորականության ներկայացուցիչներս, չենք կարող լռության մատնել՝ հայության մի հատվածի հայրենազրկումը, դրան հանգեցրած գործողությունները և առաջացած անջրպետը՝ պետական մարմինների, պետության գաղափարի և հասարակության միջև։ Այս ամենը, որ ներքին և արտաքին նոր, ավելի ուժգին մարտահրավերներ է ստեղծել, մեզ համար մտահոգություն առաջացնող է։

Հայը մշտապես պետականաստեղծ է եղել։ Եվ հենց այսօր է, որ մենք պետք է դա ոչ միայն հիշենք, այլև դրան առավել կարևորություն հաղորդենք։ Մեր պետականությունը բոլորիս կարիքն ունի՝ որպես հայության դարավոր իրականացած երազանքի դրսևորում։ Մեր ազգի ու պետության վերքերը բուժելու, Անկախության օրն իսկապես անկախ ու լիաթոք նշելու համար, մեզ նախ և առաջ անհրաժեշտ է հիշել, որ պետությունը յուրաքանչյուրս ենք, և մենք պետք է որոշենք ու մեր գործողություններով ապացուցենք, թե ինչպիսին պետք է լինի Հայաստանի Հանրապետությունը։

Միայն ու միայն մեր անմիջական մասնակցությունն է, մեր հավաքական կամքի դրսևորումը, որ թույլ կտա, ուժ կտա հաղթահարել օրեցօր ահագնացող ներքին ու արտաքին մարտահրավերները։ Ու այդ դեպքում, երբ մենք պետության համար կստանձնենք պատասխանատվություն, Անկախության օր կլինի տարվա յուրաքանչյուր օրը։
Թող լինի այդպես»։

Հայոց տուն նախաձեռնություն

«Հայոց Տուն»-ը համահայկական նախաձեռնություն, ապակուսակցական կառույց է՝ Հայությանն ու Հայոց պետականության գաղափարին նվիրյալ և փորձառու գործիչների ներգրավմամբ:

Նախաձեռնության հիմնադիրներն են՝ բժշխագիտության դոկտոր, պրոֆեսոր Արմեն Չարչյանը, ՀՀ ԳԱԱ ակադեմիկոս, պատմական գիտությունների դոկտոր, պրոֆեսոր Աշոտ Մելքոնյանը, ՀՀ ԳԱԱ ակադեմիկոս, սոցիոլոգիական գիտությունների դոկտոր, պրոֆեսոր Գևորգ Պողոսյանը, Պատմական գիտությունների դոկտոր, պրոֆեսոր, ՀՀ Արտակարգ և լիազոր դեսպան Ռուբեն Կարապետյանը, Իրավաբանական գիտությունների դոկտոր, պրոֆեսոր, Հայ Առաքելական Սուրբ Եկեղեցու Գերագույն Հոգևոր Խորհրդի անդամ Գևորգ Դանիելյանը, գորղ, հրապարակախոս, ՀՀ ԶՈՒ գնդապետ Անդրանիկ Հակոբյանը։ Մեր համախոհներն են հայկական գիտական, մտավոր ու մշակութային ոլորտի հեղինակավոր ներկայացուցիչներ։