Լրահոս

Ադրբեջանի արտգործնախարար Ջեյհուն Բայրամովը Հայաստանին է մեղադրել սահմանին սադրանքներ հրահրելու և դելիմիտացիայի գործընթացը չսկսելու համար: «Հայաստանը պետք է հասկանա, որ նման սադրանքների դիմելով՝ ոչնչի չի հասնի։ Հետևանքները լինելու են շատ ծանր ու ցավալի»,- ասել է Բայրամովը:

Գլխավոր դատախազության համար խնդրահարույց է՝ պատգամավորական անձեռնմխելիության վերաբերյալ Սահմանադրական դատարանի որոշումը: Դատախազությունը Բարձր դատարանի որոշումից 4 օր անց հայտարարություն է տարածել: Պնդում, թե պատգամավորներին անձեռնմխելիությունից զրկելու համար պարտադիր չէր դիմել Ազգային ժողով:

Առավոտյան մայրաքաղաքի ուղևորափոխադրումը կաթվածահար արած ավտոբուսների վարորդները կեսօրից հետո դադարեցրել են բողոքի ակցիան ու վերադարձել գիծ: Քաղաքապետարանի ներկայացուցչի հետ հանդիպումից հետո հայտարարել են, թե իրենց խնդիրների 90 տոկոսը լուծվել է: Ցույցի դուրս եկած վարորդների խոսքով՝ գնաճի պատճառով այնքան վատ է իրենց վիճակը, որ գիծ դուրս գալուց հազիվ մի աման փլավ են ուտում:

Բրյուսելյան հանդիպմանն ընդառաջ Ադրբեջանի արտգործնախարարը հայ-ադրբեջանական սահմանի մասին է խոսել ու Հայաստանին մեղադրել սադրանքներ հրահրելու համար: Փորձագետները կարծում են, որ հայ-ադրբեջանական սահմանի վերահսկման հարցն է տարաձայնությունների հիմնական պատճառը:

Կալանավորված 4 գերիներից մեկի փաստաբանը տղաների գերեվարման հանգամանքների վերաբերյալ աղմկահարույց մանրամասներ է պատմել: Փաստաբանի խոսքով կալանավորված զինվորները, ըստ էության, քավության նոխազ են: Նրանց ցուցմունքներից երևում է, որ զինվորները պաշտպանվելու համար բավարար փամփուշտատուփեր չեն ունեցել։

Ստամբուլի փողոցները շարունակում են ցնցվել հակաէրդողանական ցույցերից: Արդեն մի քանի օր հացի հերթ կանգնող մարդկանց կարծիքով Թուրքիայի իշխանությունը միտումնավոր է դոլարի փոխարժեքը բարձր պահում, որ իրենց գնողունակությունն ընկնի: Լիրայի անկման ու գնաճի ֆոնին հազարավոր թուրքեր բողոքի են դուրս եկել՝ աշխատավարձերը բարձրացնելու պահանջով:

Կրեմլի խոսնակը նոր մանրամասներ է պատմել Պուտին-Բայդեն տեսակոնֆերանսից: Դմիտրի Պեսկովի խոսքով՝ նախագահները հարգալից են եղել միմյանց նկատմամբ: Սակայն տարաձայնություններ են ունեցել: Կոշտ են անցել Ուկրաինայի հարցով բանակցությունները:

Առավոտից Երևանի կանգառներում կուտակումներ են՝ երթուղայինների վարորդների գործադուլի պատճառով:

Թշնամու դիտարկման կենտրոնում է նաև Գորիս-Կապանին որպես այլընտրանք կառուցված ճանապարհը՝ Տաթև-Աղվանի-Կապանը. պատգամավոր Թագուհի Թովմասյանն է Սյունիք վեջին այցի դիտարկումներից խոսել:

ՄԻԵԴ-ում Հայաստանի ներկայացուցիչն ընդունել է, որ գերիների մասին պաշտոնյաների հայտարարությունները կարող են ազդեցություն ունենալ իրավապաշտպան գործունեության վրա: Եղիշե Կիրակոսյանն այսպես արձագանքել է «Հայլուրի» հարցին՝ արդոք իրեն չի՞ խանգարի՝ Ալեն Սիմոնյանի՝ «այդ գերիներն իմ համար չկան» արտահայտությունը:

Եթե անգամ Զելենսկիին թվում է, թե շոու է այն մեծ խաղը, որ ինքը սկսել է Ռուսաստանի սահմանին, փորձագետներն արդեն վառոդի հոտ են առնում ռուս-ուկրաինական հակամարտությունից: Պուտինը էլ չի խորշում «ցեղասպանություն» բառն օգտագործել՝ Դոնբասի մասին խոսելիս: Այս շաբաթ Ուկրաինայի ռազմածովային ուժերի նավը շարժվեց դեպի Կերչի նեղուց, կանգնեց 18 ծովային մղոն հեռավորության վրա և չենթարկվեց ռուսական կողմի՝ ուղղությունը փոխելու պահանջին: Ծանր պատերազմ կարող է լինել՝ շատ լուրջ հետևանքներով: Արձանագրում են մասնագետները։

1 ամիս առաջ՝ նոյեմբերի 17-ին, Նիկոլ Փաշինյանն առաջին անգամ ասաց, թե պետք է գերեվարման ամեն դեպք քննել: Այս երեքշաբթի սկանդալային արտահոսքով համացանցում հայտնվեց տեսանյութ, որում Ալեն Սիմոնյանը դասալիք էր անվանում գերիներին: Խորհրդարանի խոսնակը մոնտաժված որակեց տեսանյութը ու տարածեց մի ուրիշը՝ ոչ պակաս մոնտաժված, ոչ պակաս սկանդալային: Գերիների, անհետ կորածների հարազատները փակեցին հանրապետության հրապարակ բերող փողոցները, ոստիկանները փորձեցին գործողություն սկսել։ Չորեքշաբթի արդեն քննչական կոմիտեն հայտնեց, որ Իշխանասարի մեկօրյա մարտերի ժամանակ գերեվարված, հետո՝ գեներալ Մուրադովի ինքնաթիռով հայրենիք վերադարձած 10 գերիները հարցաքննվել են։ 10-ից 4-ը կալանավորված են: Ստացվում է՝ Բաքվից բոլոր գերիներին դեռ հետ չբերած, Հայաստանի իշխանությունը սկսել է ձեռնաշղթաներ հագցնել վերադարձածներին՝ լեզու դնելով թշնամու բերանը, ազատություն տալով ձեռքերին:

Ցորի զորամասի հրետանային դիվիզիոնի առաջին մարտկոցի զինվոր Հայկ Մելիքյանի մորից խարդախախությամբ շորթել են 7000 դոլար: Հայկին անցած շաբաթ են հուղարկավորել՝ զինակից ընկերների հետ, բայց քանի դեռ անհետ կորած էր, ընտանիքի գլխի վերևով ուրվականների պես պտտվում էին մանր ու մեծ խարդախները: Հայկի մորաքույրը պատմել է, որ պաշտպանության նախկին փոխնախարար Վահան Շիրխանյանն ամռանը իրենց ծանոթացրել է 58-ամյա մի տղամարդու հետ, ազատամարտիկի՝ Հրահատ Մխեյան անունով: Նա իբրև թե կապեր է ունեցել Չեչնիայում և Սիրիայում, խոստացել է Ռամզան Կադիրովի միջոցով աձամբ Ալիևից ճշտել՝ որտեղ է Հայկը: Դրա դիմաց պահանջել ու ստացել է 7 000 դոլար։

Ամենանախկիններից շատերի հետ քաղաքացիական պայմանագիր կնքած, նրանց ընտրական ցուցակներ մտցրած, բայց միևնույն է՝ Տեղական ինքնակառավարման մարմինների վերջին ընտրություններում համայնքների 1 երրորդում պարտված Փաշինյանը էլ չի կարողանում առանց նյարդայնանալու տալ նախկինների անունը: Ժեստերի լեզուն ասում է՝ եթե պարբերաբար ուղղում է շորերը, ուրեմն անվստահ է, նյարդային:

«Դեպի Շուշի չեմ նայում ես, անգամ երբ հրավառություն են անում ադրբեջանցիները, դա ինձ չի հուզում: Բնական է, որ պիտի անեն, ուղղակի պիտի այնպես ապրենք, որ հաջորդ հրավառությունը մերը լինի»,- Հայլուրի տեսախցիկի առաջ անցյալի սխալները, պետության կորացած ողնաշարն ուղղելու իր պատկերացման մասին է խոսել Ազատ Ադամյանը։

Աֆրիկյան արևոտ երկրում քյոռլինգ են խաղում, բայց սառույցի վրա չէ: Երբեք ձյուն չտեսած Նիգերիայում սառույցին այլընտրանք են գտել: Մարզիկները մաշկի մանկական յուղ են քսում տաք քարերին ու սահեցնում:

Շիրակի Քարաբերդ գյուղի բնակիչներն այս տարի ավելի շատ են սիրում ձմեռը, հատկապես, երբ ձյուն է գալիս: Մեկ ամիս ջրի մի կաթիլ չտեսած քարաբերդցիները ձյունն են հալեցնում, օրինակ, սուրճ եփելու համար:

Հայաստանի երկրորդ նախագահ Ռոբերտ Քոչարյանը խոստացել է, որ «բոլոր շինծու գործերը քանդվելու են և ապօրինություն գործած պաշտոնյաները սեփական մաշկի վրա զգալու են իսկական արդարադատության ուժը»:

Հայաստանի վարչապետը գրել է, թե 2018-ից սկսած այդ նույն ուժերը փսփսում էին, թե իր իշխանությունը պատրաստվում է հանձնել հողերը ու երբ գա Արցախի, Հայաստանի շահերը զենքով պաշտպանելու ժամանակը՝ արժանահատավատ հնչի միտքը, թե «հողերը հանձնած են»: