Լրահոս

Երևանի քաղաքապետ Հրաչյա Սարգսյանն ու նրա առաջին տեղակալ Լևոն Հովհաննիսյանը Եվրոպական ներդրումային բանկի ներկայացուցիչների հետ քննարկել են նոր էլեկտրական ավտոբուսների ձեռքբերման, մանկապարտեզների հիմնանորոգման և այլ ծրագրերի իրականացմանը վերաբերող հարցեր։ Տեղեկությունը հայտնում է Երևանի քաղաքապետարանի մամուլի ծառայությունը։ Սարգսյանը նաև առանձնացրել է համայնքային պոլիկլինիկաների վերակառուցման ծրագրի կարևորությունը։ Նա ընդգծել է, որ միջազգային գործընկերների հետ վարկային ու դրամաշնորհային ծրագրերի իրականացման հարցում համայնքն այսօր ունի նաև ՀՀ կառավարության լիարժեք աջակցությունը: Շնորհակալություն հայտնելով համագործակցության ընդլայնման պատրաստակամության համար՝ Եվրոպական ներդրումային բանկի Հայաստանի պետական հատվածի վարկավորման գործառնությունների պատասխանատու Ստեֆանի Գիար-Բրանն էլ իր հերթին նշել է, որ բանկը պատրաստ է դիտարկելու նոր ծրագրեր, որոնք ուղղված են Երևանի զարգացմանն ու հարմարավետ պայմանների ապահովմանը: Սարգսյանը նաև տեղեկացրել է, որ առաջին տեղակալի հետ աշխատանքներ են տարվում եվրոբոնդեր թողարկելու ուղղությամբ, մասնագիտացված ընկերությունների ներկայացուցիչների հետ դիտարկվում են հնարավորությունները: Նախաձեռնությունը ոչ միայն կարևոր դերակատարում կունենա քաղաքի տնտեսական զարգացման համար, այլև կարևոր ու գրավիչ գործիք կլինի ներդրողների՝ ինչպես տեղական, այնպես էլ արտասահմանյան շուկայի համար:

Ազգային ժողովում շրջանառության մեջ է դրվել անչափ ողջունելի օրենքի նախագիծ, որով նախատեսվում է քրեականացնել 1️⃣Հայաստանի Հանրապետության տարածքի կամ դրա մասի՝ Հայաստանի Հանրապետությանը պատկանելիությունը կասկածի տակ դնելը կամ հերքելը, 2️⃣ նշված հանցանքի կատարումը հրապարակայնորեն արդարացնելը կամ քարոզելը, 3️⃣Հայաստանի Հանրապետության տարածքի կամ դրա մասի նկատմամբ Սահմանադրությամբ չնախատեսված եղանակով Հայաստանի Հանրապետության ինքնիշխանությունից հրաժարվելուն կամ այն սահմանափակելուն ուղղված հրապարակային արտահայտությունները, 4️⃣նշված հանցանքի կատարումը հրապարակայնորեն արդարացնելը կամ քարոզելը: Նախագիծը կարելի է անվանել նաև հող հանձնողների ու հող հանձնել քարոզողների դեմ նախագիծ: Նախագծի հեղինակներն են Արամ Վարդևանյանը, Իշխան Սաղաթելյանը և Աղվան Վարդանյանը: Սա անչափ կարևոր նախագիծ է ադրբեջանական գործակալների բերանները օրենքով փակելու համար:

Այսօր՝ փետրվարի 9-ին, կրակոց է հնչել Երևանում: Ժամը 16:30-ի սահմաններում «Արմենիա» բժշկական կենտրոնից ոստիկանության Մալաթիայի բաժին ահազանգ է ստացվել, որ «ձախ սրունքի հրազենային վնասվածք» ախտորոշմամբ իրենց մոտ է տեղափոխվել մի քաղաքացի, հայտնում է Գագիկ շամշյանը։ Ոստիկաններն ու քննիչները պարզել են, որ վիրավորը Երևանի բնակիչ, 47-ամյա Վարդան Գևորգյանն է, ով ըստ բժիշկների, այս պահին ի վիճակի չէ կատարվածի մասին բացատրություն տալու: Մինչ բժիշկները օգնություն էին ցուցաբերում վիրավորին, ոստիկանության Երևան քաղաքի վարչության ծառայողները պարզել են, որ Վ. Գևորգյանը հիվանդանոց է տեղափոխվել Կիլիկիա թաղամասի Ադանայի փողոցի թիվ 23 հասցեի մոտից: Դեպքի վայրում հայտնաբերվել է գազային ատրճանակի 1 պարկուճ: Շամշյանի տեղեկություններով՝ վիրավորը Կիլիկիայում հայտնի «Կոդո» մականվամբ Արման Գևորգյանի եղբայրն է: Նա նաև քրեական աշխարհում հայտնի, վերջերս «Բարի կամքի դեսպան» կոչմանն արժանացած Արտյոմ Հարությունովի (Կանևսկոյի Արտյոմ) ընկերն է:

Քիչ առաջ Երևանում ոստիկանության Երևան քաղաքի վարչության քրեական հետախուզության բաժնի ծառայողները «Դալմա Գադեն Մոլ» առևտրի կենտրոնի մոտ վնասազերծել ու «գետնին են փռել» Երևանի բնակիչ, 38-ամյա Գևորգ Սուքիասյանին, հայտնում է Գագիկ Շամշյանը։ Սուքիասյանը եղել է «Մակարով» տեսակի ատրճանակով զինված և նրա նկատմամբ Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով հարուցվել էր քրգործ և նա գտնվում էր հետախուզման մեջ: Վերջինս տեղափոխվել է ոստիկանության Երևան քաղաքի վարչություն, որտեղից էլ նրան տեղափոխելու են ՀՀ արդարադատության նախարարության քրեակատարողական ծառայության համապատասխան հիմնարկ, քանի որ դատարանի որոշմամբ նրա նկատմամբ կա որոշում՝ կալանքի վերցնելու համար:

Փետրվարի 7-ից 9-ը N զորամիավորման հատուկ նշանակության ստորաբաժանումների անձնակազմի հետ անցկացվել են մարտավարամասնագիտական պարապմունքներ՝ դաշտային պայմաններում։ Պարապմունքների ընթացքում կատարելագործվել են զինծառայողների մասնագիտական ունակությունները, ձմեռային պայմաններում քողարկման և գործողությունների ներդաշնակման հմտությունները։

Ռուսաստանը հանդես է գալիս Լեռնային Ղարաբաղում ՅՈւՆԵՍԿՕ-ի առաքելության արագ կազմակերպման օգտին և աշխատում է ԵԱՀԿ Մինսկի խմբի համանախագահների գծով։ Այս մասին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ «Պատմամշակութային ժառանգության պահպանման թեման քննարկվում է Բաքվի և Երևանի հետ կանոնավոր շփումների ժամանակ»,- ասել է նա: Նա հիշեցրել է, որ 2021 թվականի դեկտեմբերի 7-ին Ռուսաստանի, ԱՄՆ-ի և Ֆրանսիայի արտաքին գործերի նախարարների կողմից ընդունված համատեղ հայտարարության մեջ Հայաստանին և Ադրբեջանին կոչ է արվում շարունակել փոխգործակցությունը ԵԱՀԿ Մինսկի խմբի համանախագահների հովանու ներքո՝ հումանիտար հարցերում իրական առաջընթացի հասնելու համար, ներառյալ նաև պատմական և մշակութային օբյեկտների պաշտպանությունը:

ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ անդրադարձել է Բելառուսի նախագահ Ալեքսանդր Լուկաշենկոյի հայտարարությանը Հայաստանի՝ Միութենական պետությանը միանալու մասին: «Նման հատված այնտեղ (հարցազրույցում- խմբ.) չկա: Նա չի խոսել Միութենական պետության մասին, նա խոսել է տնտեսության, անվտանգության և այլ ոլորտներում հավանական ինտեգրացիոն գործընթացների և միավորումների մասին: Հենց Բելառուսի նախագահի ձևակերպումը, տեսլականը, քաղաքականությունն այդ իրավիճակում ինտեգրացիոն գործընթացների զարգացումն է»,- ասել է Զախարովան: Նա հավելել է, որ Միութենական պետությունը փակ կառույց չէ և չի բացառում այլ երկրների միացումը:

Եվրոպական Միության ֆինանսավորմամբ և Ավստրիական զարգացման համագործակցության համաֆինանսավորմամբ իրականացվող «Կանաչ գյուղատնտեսության նախաձեռնությունը Հայաստանում» (EU-GAIA) ծրագրի շրջանակներում՝ այսօր փոխըմբռնման հուշագիր է ստորագրվել ՀՀ սննդամթերքի անվտանգության տեսչական մարմնի և Ավստրիական զարգացման գործակալության միջև: Այս մասին հաղորդում է Սննդի անվտանգության տեսչական մարմինը: Այս հուշագրի ստորագրմամբ ՍԱՏՄ ղեկավար Գեորգի Ավետիսյանն ու ԵՄ «Կանաչ գյուղատնտեսության նախաձեռնությունը Հայաստանում» ծրագրի թիմի ղեկավար Պասխալիս Բոկկերսը հաստատել են ընդհանուր նպատակը՝ ամրապնդել տեսչական մարմնի և դրա ենթակայությամբ գործող «Հանրապետական անասնաբուժասանիտարական և բուսասանիտարական լաբարատոր ծառայությունների կենտրոն» ՊՈԱԿ-ի մասնագետների ինստիտուցիոնալ և տեխնիկական կարողությունները՝ սննդի անվտանգության վերահսկման ոլորտում ռիսկերի գնահատման և ռիսկերի կառավարման ընթացակարգերի ներդրման միջոցով, ինչպես նաև խթանելով ԵՄ սննդի համակարգի ստանդարտները և սննդի որակի վերահսկման մեխանիզմը՝ ՀՀ անասնաբուժական և բուսասանիտարական ոլորտներում: Սա նաև հիմք է սննդամթերքի անվտանգության ոլորտի տեխնոլոգիական զարգացման ուղղությամբ համագործակցելու համար. ՍԱՏՄ անձնակազմին կտրամադրվեն ուսումնական ծրագրեր, որոնք ներառում են նաև վերապատրաստումներ: Ծրագիրը նախատեսում է տեխնիկական աջակցության տրամադրում ՀԱԲԼԾԿ լաբորատորիաներին, ներառյալ` թունաքիմիկատների մնացորդների հայտնաբերման ժամանակակից մեթոդների ներդնում, լաբորատորիայի ներկայիս սարքավորումների արդիականացում և նոր ներդրված մեթոդների շուրջ՝ լաբորատորիայի անձնակազմի կարողությունների զարգացում։ Այս համագործակցությունը մեծապես կնպաստի ՍԱՏՄ կարողությունների զարգացմանն ու վերահսկողության գործիքների օգտագործումը կդարձնի առավել հասցեական:

2020 թվականի դեկտեմբերից (Արցախյան պատերազմից հետո – խմբ.) ռուսական խաղաղապահ զորախմբի միջնորդությամբ ընդհանուր առմամբ 146 մարդ է վերադարձվել։ 127-ը` հայկական կողմին, 19-ը` ադրբեջանական։ Այս մասին ամենշաբաթյա ճեպազրույցի ընթացքում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ «Ռուսաստանը ողջունում է Ադրբեջանի կողմից այս տարվա փետրվարի 7-ին հայկական կողմին 8 զինծառայողի փոխանցումը։ Կարևոր է հնարավորինս արագ վերջնականապես վերացնել այդ խանգարող երևույթը` հայ–ադրբեջանական հարաբերությունների այդ խնդրահարույց հարցը, ավարտել «բոլորը բոլորի դիմաց» ձևաչափով պահվող անձանց փոխանակումը», – ասել է նա։ Ըստ նրա` Ռուսաստանը կարևորում է զուգահեռաբար հակամարտության ընթացքում անհետ կորած անձանց ճակատագիրը պարզելու հարցում ջանքեր գործադրելը և աջակցելու է գործընթացին ինչպես ազգային մակարդակով, այնպես էլ որպես ԵԱՀԿ ՄԽ համանախագահ։

Թուրքիայում ակնկալում են, որ ՌԴ նախագահ Վլադիմիր Պուտինն իրենց երկիր կայցելի փետրվարի 14-ին։ Այս մասին «Ռիա նովոստի»-ին ասել է դիվանագիտական օղակներում նրա աղբյուրը։ Ավելի վաղ ՌԴ նախագահի մամուլի խոսնակ Դմիտրի Պեսկովը հայտարարել էր, որ Վլադիմիր Պուտինի՝ Թուրքիա կատարելիք այցի օրը դեռ որոշված չէ, սակայն այցը կայանալու է։ «Այցի ժամկետը կհրապարակվի մոտ օրերս։ Հնարավոր է, որ Պուտինի այցը փետրվարի 14-ին տեղի ունենա»,- այս առնչությամբ ասել է գործակալության աղբյուրը։

ՀՀ վարչապետ Նիկոլ Փաշինյանն արդեն ձևավորել է Երասխ- Ջուլֆա- Օրդուբադ-Մեղրի–Հորադիզ երկաթուղու կառուցման աշխատանքային խումբը։ Այս մասին Փաշինյանը հայտնեց ԱԺ–ում կառավարության հետ հարցուպատասխանի ժամանակ` անդրադառնալով «Քաղաքացիական պայմանագիր» խմբակցության պատգամավոր Գևորգ Պապոյանի հարցին։ Նա հիշեցրեց, որ 2021-ի դեկտեմբերին ԵԽ նախագահ Շառլ Միշելի և Ադրբեջանի նախագահ Իլհամ Ալիևի հետ եռակողմ հանդիպման ընթացքում Հայաստանի և Ադրբեջանի միջև երկաթուղային հաղորդակցության վերականգնման հետ կապված պայմանավորվածություն է ձեռք բերվել: Պատգամավորը հետաքրքրվեց այդ ուղղությամբ զարգացումներից, նաև ճանապարհների ապաշրջափակման գործընթացից: ՀՀ վարչապետը կարևորեց այդ երկաթուղու կառուցման, վերականգնման, գործարկման, ինչպես նաև Բրյուսելում ձեռք բերված պայմանավորվածությունների դե յուրե արձանագրումը։ «Ձևավորված աշխատանքային խումբն արդեն զբաղվում է երկաթուղու կառուցման աշխատանքները կազմակերպելու գործով։ Հիմա քննարկում ենք տեխնիկական առաջադրանքի ձևակերպման, նախագծման և կառուցման աշխատանքների ֆինանսավորման հարցը»,– նշեց Փաշինյանը և հավելեց, որ ՀՀ փոխվարչապետ Մհեր Գրիգորյանը Երևանում հանդիպում է ունեցել եռակողմ աշխատանքային խմբի ռուսաստանցի համանախագահ Ալեքսեյ Օվերչուկի և Ռուսական երկաթուղիներ ընկերության ղեկավարի հետ: Նա նշեց, որ մի կարևոր գործողություն պետք է արվի` դա Բրյուսելում ձեռք բերված պայմանավորվածությունների դե յուրե արձանագրումն է։ Փաշինյանի խոսքով` այդ ամենը կա՛մ երկկողմ, կա՛մ եռակողմ, կամ՛ որևէ ֆորմատով պետք է դառնա պայմանավորվածություն, թղթին արձանագրվի և ստորագրվի: «Պայմանավորվել ենք, որ երկաթուղին պետք է գործի միջազգային կանոնների համապատասխան՝ երկրների օրենսդրության և սուվերենության շրջանակներում, ինչը նշանակում է, որ սահմանային անցման կետերում պետք է իրականացվի սահմանային, մաքսային և այլ հսկողություն: Եվ մենք պետք է համաձայնեցնենք պարամետրերը, որպեսզի նույն պարամետրով երկաթուղի կառուցենք, որովհետև այդ երկաթուղիները պետք է կպնեն իրար: Միջազգային բեռնափոխադրումների ուղի է դառնալու»,– ասաց Փաշինյանը: ՀՀ վարչապետը նաև շեշտեց` ավտոճանապարհների և երկաթուղիների նախագիծն անվանում են հայկական խաչմերուկ, որովհետև այստեղ գործ ունեն հյուսիս-հարավ-արևելք-արևմուտք խաչմերուկի հետ, և այդ խաչմերուկի գործադրումը կարող է շրջադարձային կետ լինել Հայաստանի տնտեսության զարգացման և ֆինանսատնտեսական կարողությունների հզորացման առումով:

Այսօր՝ փետրվարի 9-ին, խոշոր ավտովթար է տեղի ունեցել Սյունիքի մարզում: Ժամը 16:50-ի սահմաններում 56-ամյա Լեռնիկ Հայրապետյանը Կապան-Նորաշենիկ ավտոճանապարհի սկզբնամասում իր վարած Ford Explorer մակնիշի ավտոմեքենայով դեռևս անհայտ հանգամանքներում դուրս է եկել ճանապարհի երթևեկելի գոտուց, մոտ 40 մետր գլորվել և կողաշրջվել է, հայտնում է Գագիկ Շամշյանը։ Վթարի հետևանքով վարորդը բժշկական օգնություն ստանալու նպատակով տեղափոխվել է «Կապան» բժշկական կենտրոն:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում Կարեն Ֆարխոյանի նախագահությամբ հրապարակվեց «Հայաստան» դաշինքի անդամ Նարեկ Մանթաշյանի խափանման միջոցի վերաբերյալ որոշումը, ըստ որի նա կմնա կալանքի տակ։ Դատարանում ներկաները վանկարկում էին՝ ամոթ։ Հիշեցնենք, որ փաստաբանը Մանթաշյանին գրավով ազատ արձակելու միջնորդություն էր ներկայացրել։

2020 թվականի նոյեմբերի 11-ի հանրահավաքից հետո, որը ընդդիմությունը հրավիրել էր պատերազմում պարտություն կրած իշխանությունների հրաժարականի պահանջով, մի խումբ քաղաքական գործիչներ ձերբակալվեցին եւ քրեական գործ հարուցվեց՝ <օրենքով սահմանված կարգի խախտմամբ հավաքներ կազմակերպելու և անցկացնելու փաստի առթիվ` ՀՀ Քր. օր. 225.1 հոդվածի 1-ին մասով և 307.1 հոդվածի 1-ին մասով>։ Ձերբակալվել էին ԲՀԿ նախագահ Գագիկ Ծառուկյանը, «Ազգային անվտանգություն» կուսակցության նախագահ Գառնիկ Իսագուլյանը, «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցը, ՀՅԴ ԳՄ անդամ Գեղամ Մանուկյանը, Մասիսի նախկին քաղաքապետ Դավիթ Համբարձումյանը, ԱԺ նախկին փոխնախագահ Արա Սահակյանը, ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը, ՀՀԿ ԳՄ անդամ Էդուարդ Շարմազանովը, «Մեկ Հայաստան» կուսակցության նախագահ Արթուր Ղազինյանը, ՀՅԴ ԳՄ ներկայացուցիչ Իշխան Սաղաթելյանը։ Այսօր տեղեկացանք, որ այս անձանց հրավիրել են Քննչական կոմիտե եւ տեղեկացրել, որ գործը կարճվել է։ Նրանց են վերադարձրել հեռախոսները, անձնագրերը, որոնք մեկ տարուց ավելի պահվում էին քննիչների մոտ։ «Հրապարակը» փորձեց զրուցել վերոնշյալ քաղաքական գործիչների հետ` հասկանալու համար, թե գործն ինչ հիմքով է կարճվել եւ վերջապես փոխհատուցում լինելո՞ւ է, կամ գոնե ներողություն խնդրե՞լ են իրենցից։ Ընդդիմադիր առաջնորդները մեկ տարվա ընթացքում՝ այս քրեական գործի պատճառով բազմաթիվ զրկանքներ են կրել՝ զրկված են եղել Հայաստանից դուրս գալու հնարավորությունից, հեռախոսներն են առգրավված եղել, հրավիրել են հարցաքննությունների․․․ նյարդային լարում, առողջական խնդիրներ, ժամանակի վատնում՝ այս բոլոր վնասների փոխհատուցումն ինչպե՞ս է կատարվելու: ԱԺ «Հայաստան» խմբակցության պատգամավոր Գեղամ Մանուկյանը մեզ հետ զրույցում նախ հաստատեց վերոնշյալ լուրն, ապա ընդգծեց, որ որեւէ փոխհատուցման մասին խոսք անգամ չի գնացել, անգամ ներողություն չեն խնդրել իրենցից: Մանուկյանն ասաց` գործը կարճվել է հավանաբար փաստերի բացակայության պատճառով: «Հայտնի է, որ քրեական գործ հարուցվեց, քաղաքական գործիչներ կալանավորվեցին, այն բանի համար, որ Նիկոլ Փաշինյանի դավաճանական իշխանությունն ամեն կերպ պահեն», - նշում է պատգամավորը: Իշխան Սաղաթելյանն էլ մեզ հետ զրույցում նշեց, որ դեռեւս իրեն չեն հրավիրել  բաժին, սակայն կարճման մասին արդեն իսկ տեղյակ է: «Մինչեւ այս պահը դեռ ինձ ոչինչ չեն ասել: Մեկ ամիս առաջ արտերկրում հանդիպում ունեի, սակայն այդ գործի պատճառով մերժեցին երկրից դուրս գալը», - նշում է Սաղաթելյանը: «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցն էլ մեզ հետ զրույցում նշեց, որ հիմա վատառողջ է, կարճված գործի հիմքերին դեռեւս ծանոթ չէ, սակայն ենթադրվում էր, որ այս գործը պետք է կարճվի, քանի որ չկար որեւէ հիմք: Մենք կապվեցինք նաեւ գործը քննող քննիչի՝ Մարտիրոսյանի հետ, ով հրաժարվեց մեր հարցերին պատասխանել։ Մենք ընդամենը հետաքրքրվում էին, թե ով է պատասխան տալու կեղծ, անհիմն գործ հարուցելու համար, պատժվելո՞ւ են անհիմն գործ հարուցողները եւ արդյո՞ք այս անձանցից գոնե ներողություն են խնդրելու՝ պատճառած անհանգստությունների համար։   Ամբողջական հոդվածը կարող եք կարդալ այս հասցեով՝ : https://hraparak.am/post/03ec7c4fd5e48379f1b02b7504b701ab?fbclid=IwAR09MEO9gbahGmgv5bYwZcxfQnrBkOjcqtQZrjGdeSI8DG6XH2lZbDzGe3k © 2008 - 2021 «Հրապարակ օրաթերթ»

Փետրվարի 5-ին քրեական ոստիկանության գլխավոր վարչության ծառայողները Երևանի Փափազյան փողոցում հայտնաբերել և գլխավոր վարչություն բերման են ենթարկել Երևանի Սերո Խանզադյան փողոցի 36-ամյա մի բնակչի: Նա ոստիկանության Վաղարշապատի բաժնի կողմից 2020 թվականի դեկտեմբերից հետախուզվում էր բնակարանային գողության մեղադրանքով։

ՀՀԿ ԳՄ անդամ Էդուարդ Շարմազանովը ֆեյսբուքյան իր էջում գրել է․ «Երասխ- Ջուլֆա-Օրդուբադ-Մեղրի-Հորադիզ երկաթուղու կառուցումը տասնամյակներ շարունակ եղել է թուրքերի երազանքը։ Դրա մասին են երազել Վեհիբ փաշան, Կարաբեքիրը, Դեմիրելը…. Ո՞վ կպատկերացներ, որ կգա մի օր ու Հայաստանի վարչապետի աթոռին բազմած անձը ԱԺ-ում կգովաբանի այդ պանթուրքիստական նախագիծը։ Ու դա ամբողջը չէ. նա հանձնարարական է տվել աշխատանքային խումբ ձեւավորել, որը կզբաղվի այդ թուրքական երկաթուղու կառուցմամբ։ Բարի գալուստ էրմենիստա՞ն… Հ.Գ. Ի՞նչ «հայկական խաչմերուկ»։ Դա ոտքից գլուխ «թուրքական խաչմերուկ» է»։

Քննչական կոմիտեն կարճել է ԲՀԿ նախագահ Գագիկ Ծառուկյանի, «Ազգային անվտանգություն» կուսակցության նախագահ Գառնիկ Իսագուլյանի, «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցի, ՀՅԴ ԳՄ անդամ Գեղամ Մանուկյանի, Մասիսի նախկին քաղաքապետ Դավիթ Համբարձումյանի, ՀՅԴ ԳՄ անդամ Գեղամ Մանուկյանի, Մասիսի նախկին քաղաքապետ Դավիթ Համբարձումյանի, նախկին փոխնախագահ Արա Սահակյանի, ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանի, ՀՀԿ ԳՄ անդամ Էդուարդ Շարմազանովի, «Մեկ Հայաստան» կուսակցության նախագահ Արթուր Ղազինյանի, ՀՅԴ ԳՄ ներկայացուցիչ Իշխան Սաղաթելյանի վերաբերյալ քրեական գործը։ Տեղեկությունը News.am-ին հայտնել է Գեղամ Մանուկյանը։ ՔԿ-ն քրեական գործը հարուցել էր ՀՀ ՔՕ 225.1 հոդվածի 1-ին մասով (օրենքով սահմանված կարգի խախտմամբ հավաք կազմակերպելը եւ անցկացնելը) և 307.1 հոդվածի 1-ին մասով (ռազմական դրության իրավական ռեժիմի ընթացքում գործող միջոցառումները և ժամանակավոր սահմանափակումները խախտելը)։ Հիշեցնենք, որ 2020 թվականի նոյեմբերի 11-ի հանրահավաքից հետո, որը ընդդիմությունը հրավիրել էր պատերազմում պարտություն կրած իշխանությունների հրաժարականի պահանջով, մի խումբ քաղաքական գործիչներ ձերբակալվեցին և քրեական գործ հարուցվեց։

29-ամյա Վասակ Գազանճյանն ու 23-ամյա Կարինե Գեւորգյանը ոստիկանության Քանաքեռ-Զեյթուն բաժնի կողմից հետախուզվում են ապօրինի թմրաշրջնառության մեղադրանքով: Խափանման միջոցը կալանք: «Նրանց գտնվելու մասին տեղեկություն ունեցողներին խնդրում ենք դիմել ոստիկանության քանաքեռ Զեյթունի կամ մոտակա բաժին»,-ասված է տարածած հաղորդագրության մեջ:

Այսօր՝ փետրվարի 9-ին, կայացել է ՀՀ հյուսիսարևելյան ուղղությամբ մարտական հերթապահություն իրականացնող զորամասերից մեկի նորակոչիկ զինծառայողների երդման հանդիսավոր արարողությունը: Զորամասի հրամանատար, գնդապետ Վահան Սարգսյանն իր ելույթում մասնավորապես նշել է. «Այսօր պատասխանատու և հիշարժան օր է. մեր զինվորները հայրենիքին անձնվիրաբար ծառայելու երդում տվեցին: Ես վստահ եմ, որ այդպես էլ կծառայեն: Սիրելի՛ նորակոչիկներ, զորամասը, որտեղ դուք ծառայելու եք, հզոր ու հաղթական մարտական ուղի է անցել. դեռ 90-ական թվականներից, երբ ձևավորվում էր բանակը, մեր զորամասն առաջնագծում էր և առ այսօր առաջնագծում է՝ պատվով ու ամենայն պատասխանատվությամբ կատարելով իր առջև դրված խնդիրները»: Բերդ համայնքի ղեկավարի տեղակալ Սամվել Հովսեփյանը երդման արարողության կապակցությամբ շնորհավորել է նորակոչիկներին, նրանց ծնողներին, ներկաներին. «Պատահական չէ, որ երդման արարողությունն անցկացվում է հենց այս վայրում. սա մեր համայնքի խորհրդանիշներից մեկն է: Մենք գտնվում ենք պատմական Տավուշ ամրոցի վարչական սահմաններում: 3000 և ավելի տարիներ այստեղ ամեն քար ու թուփ խոսում են հայերեն: Մեր պապերն այստեղ են արարել, աշխատել, կռվել... Ցավոք, ունցել ենք նաև կորուստներ, բայց վերջնական արդյունքում՝ մենք հաղթել ենք, քանի որ այստեղ ենք: Մեր պապերի 3000 տարվա ճշմարտությունը «վերափաթեթավորված» հասել է մեզ. կա երկու ճշմարտություն՝ «Ուժն է ծնում իրավունք» և «Զինվորի «сапог»-ն է գծում երկրի սահմանը»: Սիրելի՛ նորակոչիկներ, շնորհավորում եմ ձեզ երդման արարողության կապակցությամբ: Ձեզ բախտ է վիճակվել պաշտպանել մեր երկրի սահմանները՝ Տավուշ աշխարհում: Դուք այն զինվորներն եք, ովքեր կերտելու են վաղվա հաղթանակները»: Դիմելով նորակչիկներին՝ Բերդի և տարածաշրջանի հոգևոր հովիվ Տեր Արամ քահանա Միրզոյանն ասել է. «Սիրելի՛ նորակոչիկներ, երբեք, ոչ մի վայրկյան չմտածեք, թե ծառայության տարիները կորուստ են ձեր կյանքից: Միշտ հիշեք, որ այս երկու տարիներն ամենակարևոր ներդրումն են ձեր կյանքում, որովհետև հնարավոր չէ խուսափել առաքելությունից և լինել երջանիկ, հնարավոր չէ խուսափել պատասխանատվությունից և շարունակել ապրել հանգիստ խղճով: Ձեր ծառայությամբ հզորացրեք մեր բանակը և ամբողջ կյանքում կքայլեք գլուխներդ բարձր՝ որպես հայրենիքի տեր: Այո՛, հայրենիքը պատկանում է նրանց, ովքեր պաշտպանում են այն»: ՀՀ ՊՆ ռազմական ոստիկանության Բերդի բաժնի պետ, գնդապետ Սերոբ Արշակյանը նույնպես շնորհավորել է նորակոչիկներին երդման արարողության կապակցությամբ. «Տղանե՛ր, զինվորական երդում տալը, մեր բանակի շարքերը համալրելը, երկու տարի հայրենիքի պաշտպանությանը նվիրելը մեծ պատիվ է: Ես լիահույս եմ, որ ձեր երդմամբ տրված խոստումը պահպանելու եք և բարձր եք պահելու ձեր ընտանիքների ու ձեր պատիվը: Վստահ եղեք, որ աջակցելու ենք ձեզ, որպեսզի կարողանաք հեշտությամբ հաղթահարել ծառայության դժվարությունները: Միասին ենք պաշտպանելու մեր հայրենիքը»: