Լրահոս

Նորից բողոքի ակցիա են արել ավտոներկրողները: Նրանք դժգոհում են, որ ավտոներկրման հետ կապված բազմաթիվ խնդիրների առաջ են կանգնում Վրաստանում՝ իսկ մեր կառավարությունը՝ թեև տեղյակ է՝ բայց ոչինչ չի անում: Նրանց շահերը պաշտպանող միության նախագահը վարչապետից պահանջում է, որ վաղը Հայաստան եկող վրացի պաշտոնակցի հետ խոսի և իմանա, թե ինչո՞ւ են Փոթիում հայ ներկրողներին անընդհատ տուգանում ու միտումնավոր խնդիրներ ստեղծում:

Սիրիայում թուրքական հրետանուց փախչող հայ ընտանիքների մի մասը ապաստան է գտնում հայաշատ Հալեպում: Կրակի գոտիներում մնալը կենաց-մահու խնդիր է, խոստովանում են սիրիահայերը: Հալեպում ավելի ապահով են, բայց անորոշ սպասման մեջ:

Ամենամեծ թալանն ու կոռուպցիան հիմա է՝ հեղափոխությունից հետո: Նման կարծիքի է նախկին վարչապետ Հրանտ Բագրատյանը: Նա անհանգիստ է՝ որ Հայաստանի ընդերքի հարստությունը՝ էժան է վաճառվում: Նախկին վարչապետին այսօր հակադարձել է Էկոնոմիկայի նախարար Տիգրան Խաչատրյանը:

ՀՄԸՄ 12-րդ ընդհանուր ժողովին ընդառաջ Երևանում բացվեց Շավարշ Քրիսյանի կիսանդրին:

Սիրիայում ստեղծված հումանիտար ճգնաժամի ֆոնին՝ Հայաստանում սկսվում է Ավրորա միջազգային մարդասիրական ֆորումը: Այս տարի Ավրորան ընդլայնում է ձևաչափն ու բացի մարդասիրական մրցանակաբաշխությունից՝ տեղի է ունենում նաև Ավրորա ֆորումը: Այն գիտա- տեխնոլոգիական կոնֆերանսների շարք է, որտեղ քննարկում են նոր աշխարհի՝ նոր խաղի կանոնները:

Հայաստան գալու ցանկություն ունեցող սիրիահայերին այդ երկրում պատրաստ են օգնել մեր դիվանագետները: Արտգործնախարարության խոսնակ Աննա Նաղդալյանն ասել է, ու ավելացրել, որ Սիրիայում մեր դիվանագիտների հետ աշխատում են արտակարգ ռեժիմով:Նաղդալյանը նաև տեղեկացրել է, որ տարածաշրջան եկած ԵԱՀԿ Մինսկի խմբի համանախագահները՝ կայցելեն Արցախ:

Ռազմական գործիչ Գևորգ Գևորգյանն ու Թալին ջոկատի հրամանատարը այսօր ասել են, որ հնարավոր է շուտով ընդդիմադիր նոր շաժում ձևավորեն: Նրանց հատկապես վտանգավոր է թվում՝ իշխանությունների՝ Արցախյան պատերազմի հերոսներին միտումնավոր վարկաբեկելու քաղաքականությունը:

Մարդու իրավունքների եվրոպական դատարանն (ՄԻԵԴ) ընդունել է Սահմանադրական դատարանի կողմից ՄԻԵԴ ներկայացված դիմումը՝ Երևան քաղաքի առաջին ատյանի ընդհանուր իրավասության դատարանի և Ռոբերտ Քոչարյանի դիմումների հիման վրա Սահմանադրական դատարանի կողմից քննության ընդունված գործերով խորհրդատվական կարծիք ստանալու համար։

WCIT-ն իրոք թեժացրեց Երևանի տեխնո-աշունը: Ի դեպ՝ Տեղեկատվական տեխնոլոգիաների համաշխարհային համաժողովը Հայաստանում այս տարի անցկացնելու որոշումը կայացրել էր դեռ Հովիկ Աբրահամյանի կառավարությունը: 2016-ին գործադիրը 150 հազար դոլոր էր տվել՝ որպես կանխավճար, որ 2019-ին աշխարհի 80 երկրի պատվիրակները Հայաստան գան: Իսկ Կարեն Կարապետյանի ժամանակ գործը լրիվ հարթ ռելսերի վրա էր դրվել:

Մանկական մահացության վերջին՝ ամենաառեղծվածային դեպքից հետո երկու շաբաթ լռություն պահպանած Արմենիա բժշկական կենտրոնը այս շաբաթ ի վերջո պարզաբանումներ տվեց պատմության վերաբերյալ՝՝ սկանդալային հայտարարություններով՝ պարզվում է նորածնային մահացության շուրջ աղմուկը բարձրացել է լրագրողների պատճառով, որ սիրում են խոսել փոքր բաների մասին: Սա այն դեպքում, երբ 2.5 ամսում 4 նորածին և 3 ծննդկան է մահացել: Իսկ սեպտեմբերի 24-ին ծննդաբերած Հայկուհին, որին ասել են, թե պտուղը մահացած է ծնվել, շարունակում է պնդել, որ որդին ողջ է, որովհետև հակառակ իր պահանջներին՝ նրան մինչև հիմա ցույց չեն տվել նորածնի մարմինը:

Այս շաբաթ Թուրքմենստանում վարչապետ Փաշինյանը ճաշի սեղանի շուրջ 1,5 ժամ զրուցել է Ադրբեջանի նախագահի հետ, պատմության դասեր տվել Իլհամ Ալիեւին: Կոչ արել՝ չվիրավորել հայ ժողովրդին և ԱՊՀ պետությունների ղեկավարներին: Առաջնորդների հավաքի ժամանակ Ալիևն ասել էր, թե Հայաստանում հերոսացվում է ֆաշիզմը՝ նկատի ունենալով Երևանի կենտրոնում կանգնեցված Գարեգին Նժդեհի արձանը: Փաշինյանի՝ Ալիևի մասին նախկինում արած այն որակումները, թե նա կիրթ մարդ է, ըստ էության ունեցել էին նույն արձագանքը, ինչ այս անգամվա՝ չափազանց կոշտ պատասխանը: Հավանաբար որովհետև խաղաղություն բառը ադրբեջաներեն չի թարգմանվում: Միայն անցնող շաբաթ արցախա-ադրբեջանական շփման գոտում հակառակորդը հրադադարը խախտել է ավելի քան 90 անգամ` 700 կրակոցով: Մեր առաջապահ զորամասերը շարունակում են վստահորեն իրականացնել մարտական խնդիրը:

Անկարան խաղաղության ակունքի անվան տակ սպանում է Սիրիայի՝ հարյուրավոր խաղաղ բնակիչների, որոնց թվում արդեն երեխաներ կան: Սա շաբաթվա ամենապոպուլյար հեշթեգն է, ոչ թե փրկենք Սիրիան, այլ արդեն պարզապես՝ Սիրիա, որ պատերազմում է 8 տարի ու դեռ դաս չի լինում որևէ մեկի համար: Ռազմատենչ Թուրքիայի քթի տակ մեր երկիրը ուրիշ հեշթեգեր ունի՝ զբաղվում ենք ամեն ինչով՝ ձվոտ հայելիներից մինչև Քիմ Քարդաշյան՝ մոռանալով, թե ինչ կա երկրի հակառակ կողմում:

Ապրիլյան պատերազմի հանգամանքները քննող խորհրդարանական հանձնաժողովը շարունակում է աշխատել հույժ գաղտնի պայմաններում, ըստ օդում կախված լուրերի, հանձանաժողովը, որ ղեկավարում է Մարտի մեկի փաստահավաք խմբի նախկին ղեկավար Անդրանիկ Քոչարյանը, փորձում է մասնավոր զրույցներում հավաքել այնպիսի փաստեր, որոնք կհաստատեն ապրիլյան քառօրյայից հետո նաև ընդդիմադիր մեդիայի միջոցով լայն շրջանառության մեջ դրված ռազմական միֆերը: Դրանք հայտնի են բոլորին:

1.5 տարի անցավ այն իրադարձություններից, որ Հայաստանի նոր իշխանությունը կոչում է ոչ բռնի, թավշյա հեղափոխություն, իսկ Հայաստանի նոր ընդդիմությունը՝ իշխանափոխություն, որից հետո հները կոչվեցին սև, հասարակությունը բաժանվեց մերոնքի ու ձերոնքի: Սա նաև քրեական գործերով ու դատական պատմություններով գերբեռնված 1.5 տարի էր: Եվ դրանց մեջ գործ համար մեկը հարուցված է միանգամից 4 նախկին բարձրաստիճան պաշտոնյայի դեմ, այդ թվում՝ Արցախի առաջին ու Հայաստանի երկրորդ նախագահի:

Վայոց ձորի մարզի Քարագլուխ գյուղում մի արջ ընկել է թակարդը: Դեպքի վայր փրկարարներ են մեկնել արտակարգ իրավիճակների նախարարությունից: Պարզվել է, որ արջի թաթն ընկել է հողամասի մետաղյա ցանկապատի մեջ: Փրկարարնեը ազատել են ծուռթաթին լարերի ճիրաններից: Վայրի բնության հիմնադրամի աշխատակիցները արջին քնեցրել են ու տեղափոխել անվտանգ տարածք: