Լրահոս

Իմ եղբայրը վարձով էր ապրում, բայց վերջերս վարձատուն եռապատկելէ վարձավճարը՝ ասելով, որ կան ավելի գրավիչ տարբերակներ վարձով տալու և երկար ժամանակի կանխավճարով։ Կառավարության այսօրվա նիստի ժամանկ Էկոնոմիկայի նախարար Վահան Քերոբյանն է կիսվել։ «Քան որ խնդիրը իսկապես սուր է, ուզում եմ գործընկերներին կոչ անել, որ մայիսի 20-ը վերջնաժամկետ է, բայց փորձենք ինչքան հնարավոր է արագ գործիք մտցնենք շուկա, որպեսզի վարձով տների առաջարկը շուկայում կարողանա զսպել այսպիսի բարձր գնաճը։ Արդյուքնում Հայաստանի քաղաքացիները, որ երկար ժամանակով վարձում էին Երևանում, հիմա իրենք են փողոցում հայտնվում»։

«Հրապարակ» թերթը գրում է․ «Հարցազրույց ԱԺ «Հայաստան» խմբակցության պատգամավոր Գեղամ Մանուկյանի հետ։ - Նիկոլ Փաշինյանն իր ելույթով պարզ հասկացրեց, որ Արցախը պետք է լինի Ադրբեջանի կազմում՝ ուրիշ ճանապարհ չկա։ Որո՞նք են ձեր քայլերը։ - Այն թեզերը, որ Նիկոլ Փաշինյանը հնչեցրել է, տեւական ժամանակ կրկնվող թեզերի, հայտարարությունների հանրագումարն են։ Այդ բոլոր թեզերին մենք բազմաթիվ փաստարկներով ներկայացրել ենք հակաթեզեր, ներկայացրել ենք այն ստերը, թյուրիմացությունները, որ նա չի հասկացել բանակցային պրոցեսը, բայց կառչած է մնում իր այդ, պայմանական ասած՝ «խաղաղության դարաշրջանից»։ Կարծում եմ՝ այդ հայտարարությամբ ամբողջ հասարակության մեջ գծվում է ջրբաժան՝ «կա՛մ-կա՛մ»-ի հարց է դրվում հայ ժողովրդի առաջ։ Եվ սրան պետք է դիմագրավել, քանզի այսօրվա սերունդն իրավունք չունի հետագա բոլոր սերունդների փոխարեն նման որոշում կայացնել, որը ճակատագրական կլինի։ - Այսինքն՝ հասել ենք մի փուլի, որ պետք է գործնական քայլերից խոսենք, որո՞նք են լինելու ձեր քայլերը։ - Հանրային ընդվզում, հանրային դիմադրություն։ Այդ մասին բարձրաձայնել ենք, դրա մի արտահայտությունը եղավ ապրիլի 5-ի հանրահավաքը, առաջիկայում այդ գործողությունները շարունակվելու են։ - Այսօր, երբ արդեն բացահայտ են Նիկոլ Փաշինյանի մտադրությունները, ընդդիմությանը ձայն տված շատ քաղաքացիներ իրենց հիասթափությունն են արտահայտում ձեզնից` պահանջում են կոնկրետ գործողությունների գնալ։ - Ես վստահ եմ՝ այդ մարդիկ, վաղը եթե հանրահավաք կայանա, բոլորն էլ ներկա են լինելու, որովհետեւ սիրում են հայրենիքը, սիրում են Արցախը։ Միշտ այդ քննադատությունը կա, բայց ես չեմ էլ փորձում արդարացումներ փնտրել, թե չէ կարող եմ 2020 թվականի նոյեմբերից սկսած՝ պայքարի այդ ամիսները հիշեցնել, որ, ի վերջո, փողոցում, հրապարակում մնում էինք ընդամենը մի քանի հարյուր հոգի։ - Իսկ երբ փողոցում մի քանի տասնյակ հազարներով էիք, դուք ոչ մի գործողություն չէիք անում, ամեն անգամ մարդկանց ուղարկում էիք տուն։ - Չէ... մեր հայրենակիցների հետ որ խոսում եմ, ասում են՝ գործողությունը ո՞րն է։ - Ասում են՝ գնայինք մտնեինք կառավարական ամառանոց, երբ հասել էինք Պռոշյան փողոց, կամ նոյեմբերի 9-ին հարցերը լուծեիք, հիմա կառավարության շենք մտնողները դատվում են։ Դուք պատգամավոր եք՝ մանդատ ունեք, իսկ մյուսները մանդատ չունեն եւ դատվում են, օրինակ՝ Նարեկ Մանթաշյանը։ - Եկեք տարբերակում չդնենք՝ մեկը մանդատավոր է, մյուսը՝ դատվում է, որովհետեւ մի քանի օր առաջ է իմ քրեական գործը կարճվել, տղաս էլ դատարաններից տուն չի գալիս` դատվում է։ Անհրաժեշտ է հասարակության այնպիսի համախմբում, ներկայություն հրապարակներում, որին դիմագրավելը լինի անհնար։ - Դուք մտածե՞լ եք այն մասին, թե ինչով չեք արդարացնում ձեր ընտրողների հույսերը, ինչն է խանգարում, որ արդարացնեք։ - Մի առակ կա էշի եւ իշատիրոջ մասին։ Երբ հայր ու տղա քայլում են, կողքներից էլ էշն է քայլում, անցորդներից մեկն ասում է՝ նայեք սրանց, էշը կողքները՝ չեն նստում էշի վրա։ Երկուսով նստում են էշի վրա։ Մի քիչ էլ են անցնում, մեկն ասում է՝ նայեք, խեղճ էշի վրա երկուսով են նստել․ հայրն իջնում է, տղան՝ նստում։ Մեկ ուրիշն էլ ասում է՝ նայեք, ջահել տղան նստել է, հայրը ոտքով է։ Ու էդպես՝ վերջում հայր ու տղա էշը գրկած՝ շարունակում են ճանապարհը։ Գիտե՞ք, մեր ընտրողների, մեր հասարակության ամեն շրջանակ յուրովի է պատկերացնում, թե ինչ գործունեություն պետք է իրականացնենք։ Մի շրջանակ ասում էր՝ հերիք է գոռաք կամ կռիվ անեք Ազգային ժողովում, պետք է գործ անել, պետք է օրենքների նախագծերով ժողովրդին ցույց տալ, որ մենք իրական այլընտրանք ենք այս իշխանությանը։ - Դրա համար պետք է հստակ ձեւակերպեք, թե ձեզ ձայն տված 300 հազար քաղաքացիներն ինչ առաքելությամբ են ձեզ պատվիրակել, գործուղել ԱԺ, որ ի՞ նչ անեք։ - Մի քանի հստակ ձեւակերպումներ էին. սա սովորական խորհրդարանական ընդդիմություն չէ, որ ուղղակի օրենսդրական գործունեություն ծավալի Ազգային ժողովում։ Այս խորհրդարանական խմբակցությունն օգտագործել է իր բոլոր գործիքակազմերը՝ խանգարելու այս իշխանությունների ապազգային գործողություններն ու նախաձեռնությունները , երկրորդ՝ ստեղծի մի իրավիճակ, որ հնարավորինս շուտ այս իշխանությունները հեռանան։ Բայց պետք է արձանագրենք մի բան, որ քվեարկությամբ մեր քվեները չէին հերիքելու խորհրդարանում, ուստի մենք պետք է օգտագործենք այն գործիքները, որով կարող ենք ինչ-որ հարց արծարծել, որն անում ենք, եւ հասկանում եմ, որ քվեարկությամբ հարց որոշողը մենք չենք, եւ նաեւ հասկանում ենք, որ ընտրություններին ժողովուրդն այդ լծակը տվել է սրանց։ - Այս օրերին նորից հարց են բարձրացնում, թե ինչու չեք դնում մանդատները եւ դուրս գալիս։ Քանի՞ գրոշի արժեք ունի այս պահին ընդդիմության էքզիստենցիալ գոյությունն ԱԺ-ում։ - Ի սկզբանե ասեմ, որ խորհրդարանական ընտրություններն ավարտվել ե ն , այդ հարցը քննարկվել է, եւ այդ ժամանակ էլ որոշումը կայացվել է, որ մանդատները դնելու հարցը մեր օրակարգում է, եւ երբ անհրաժեշտ համարենք...։ Բայց զուգահեռ նաեւ կուզեմ երկու իրողություն ասել․ 29 հոգի մանդատները դրեցին, գալիս է մյուս 29-ը, նրանք էլ դուրս եկան, գալիս է մյուս 29-ը։ Չեղավ «Հայաստան» դաշինքի որեւէ պատգամավոր խորհրդարանում` հայտնվելու է մեկ այլ կուսակցություն՝ ավելի քիչ քվե ստացած։ - Թող հայտնվի։ Տարբերությունն այն կլինի, որ այդ մանդատն ու աշխատավարձը դուք չեք ստանա, ասենք՝ «Լուսավոր Հայաստանը» կստանա։ - Անկեղծ ասեմ՝ մեր խմբակցության անդամների մեծ մասը այն աշխատանքները, որ թողել է, ավելի բարձր աշխատավարձ է ստացել, քան խորհրդարանում է ստանում։ - Բայց ոմանք գուցե երազում էին մանդատ ունենալու եւ խորհրդարանում հայտնվելու մասին: - Մի հատ արագ աչքի անցկացնեմ՝ մեր խմբակցության պատգամավորների մեծ մասը, ամեն մեկը կայացած է։ - Բայց, ամեն դեպքում, ձեր՝ մանդատ ունենալը չի արդարացվում։ - Ես խոստանում եմ՝ մանդատ դնելու որոշումը որ կայացնենք, առաջինը Դուք կիմանաք։ - Դրանից, միեւնույն է, երկիրն էլի չի փրկվի։ Մոտ մեկ տարի է՝ պատգամավոր եք, ուզում եմ հասկանալ՝ քանի՞ մետրով, քանի՞ քայլով եք մոտեցել իշխանափոխությանը` ձեր գործիքակազմով, որը, պարզ է, շատ լայն չէ։ - Առնվազն ես կարող եմ ասել էն հանրային տրամադրությունների փոփոխությունը, որ մեր խոսքով, հանդիպումներով, գործով հասարակության մեջ տեղի է ունեցել։ - Դա արտացոլվե՞ց ապրիլի 5-ի հանրահավաքի ժամանակ, օրինակ, թվային առումով։ - Տեսեք, հանրահավաքները, որ մենք հրավիրում ենք, գլխաքանակով կյանքում չենք հաշվել, որովհետեւ մեր հանրահավաքներում ես տեսնում եմ անհատ դեմքեր»:

Ավարտվել է ՀՀ հակակոռուպցիոն կոմիտեում քննվող՝ ձեռնարկատիրական գործունեությանն ապօրինի մասնակցելու, առանձնապես խոշոր չափերով կաշառք ստանալու, փողերի լվացման և այլ չարաշահումների դեպքերի առթիվ հարուցված քրեական գործի նախաքննությունը: Նշված քրեական գործով վարույթն իրականացնող քննիչի դեկտեմբերի 6-ի որոշմամբ Աղվան Հովսեփյանին վերջնական մեղադրանք էր առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, 311-րդ հոդվածի 4-րդ մասի 2-րդ կետով, 310-րդ հոդվածով (3 դրվագ) և 190-րդ հոդվածի 3-րդ մասի 1-ին կետով (հինգ դրվագ): Իսկ 2021թ դեկտեմբերի 10-ի որոշմամբ Վրեժ Մարկոսյանին վերջնական մեղադրանք էր առաջադրվել ՀՀ քրեական օրենսգրքի 38-178-րդ հոդվածի 3-րդ մասի 1-ին կետով: Մեղադրական եզրակացությունը կազմելու համար հավաքված ապացույցները բավարար համարելով՝ վարույթն իրականացնող մարմինը հայտարարել էր նախաքննության ավարտ և քրեական գործի նյութերը ծանոթացման նպատակով տրամադրել մեղադրյալներին և նրանց պաշտպաններին: 2021թ. դեկտեմբերի 13-ին ՀՀ գլխավոր դատախազությունում ստուգման նպատակով ստացվել էր քրեական գործը, որով նախաքննության օրինականության նկատմամբ հսկողություն և դատավարական ղեկավարում իրականացնող դատախազի կողմից քննիչին տրվել էր քրեական գործի լրիվությունը, օբյեկտիվությունը և բազմակողմանիությունն ապահովելու նպատակով անհրաժեշտ քննչական ու դատավարական գործողություններ կատարելու վերաբերյալ գրավոր ցուցում: Ցուցումի կատարման արդյունքում հետագա նախաքննության ընթացքում գործով ձեռք են բերվել ինչպես Աղվան Հովսեփյանին առաջադրված մեղադրանքները հիմնավորող, այնպես էլ առանձին մեղադրանքներում արդարացնող, որոշ արարքների իրավաբանական որակումը փոփոխելու համար հիմք հանդիսացող, ինչպես նաև նրա կողմից ևս մեկ այլ, նախկին մեղադրանքում չներառված, ՀՀ քրեական օրենսգրքի 38-308-րդ հոդվածի 2-րդ մասով նախատեսված արարք կատարելու վերաբերյալ ապացույցներ: Ըստ այդմ, գործով ձեռք բերված ապացույցների գնահատման արդյունքում վարույթն իրականացնող քննիչի 2022թ. ապրիլի 4-ի որոշմամբ Ա. Հովսեփյանին նոր մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով նախատեսված հանրորեն վտանգավոր արարքներ կատարելու համար: Մյուս մեղադրյալ Վ. Մարկոսյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նախաքննության ընթացքում կալանք է դրվել Ա.Հովսեփյանի և նրա հետ փոխկապակցված անձանց՝ կնոջ ու որդիների անվամբ գրանցված 6 տասնյակից ավելի անշարժ, շարժական գույքերի, դրամական միջոցների, ինչպես նաև Ա.Հովսեփյանի հետ փոխկապակցված թվով 15 ՍՊ ընկերությունների շարժական և անշարժ գույքերի, դրամական միջոցների և կանոնադրական կապիտալում առկա բաժնեմասերի վրա: Կալանք է դրվել նաև Վ.Մարկոսյանի 800.000.000 ՀՀ դրամ արժողությամբ անշարժ, շարժական գույքերի և ֆինանսական (դրամական) միջոցների վրա: Քրեական գործը մեղադրական եզրակացությամբ ստացվել է ՀՀ գլխավոր դատախազությունում: 2022թ. ապրիլի 15-ին հսկող դատախազի կողմից մեղադրական եզրակացությունը հաստատվել է և ըստ էության քննելու համար գործն ուղարկվել է Երևան քաղաքի առաջին ատյանի ընդհանուր իրավասության դատարան: Բացի այդ, վերոնշյալ քրեական գործով վարույթն իրականցնող մարմնի կողմից 2022թ. ապրիլի 1-ին որոշում է կայացվել ՀՀ Արագածոտնի մարզի Բյուրական համայնքի նախկին ղեկավար Հ. Ավագյանի նկատմամբ ՀՀ քրեական օրենսգրքի 308-րդ հոդվածի 2-րդ մասով, իսկ համայնքապետարանի աշխատակիցներ Ա Սարգսյանի և Ա. Դավթյանի նկատմամբ՝ ՀՀ քրեական օրենսգրքի 38-308-րդ հոդվածի 2-րդ մասով և 314-րդ հոդվածի 1-ին մասով քրեական հետապնդում չիրականացնելու մասին՝ քրեական պատասխանատվության ենթարկելու վաղեմության ժամկետն անցնելու հիմքով: Նշված որոշմամբ հաստատվել է, որ Բյուրական համայնքի ընդհանուր՝ 27.796 հա մակերեսով թվով 10 հողատարածքները ձևական աճուրդի միջոցով 2010թ. հոկտեմբերի 25-ին օտարվել են ՀՀ նախկին գլխավոր դատախազ, ապա՝ ՀՀ քննչական կոմիտեի նախագահ Ա. Հովսեփյանի որդուն՝ Ն. Հովսեփյանին: Նշված հողամասերի հետ կապված, ի թիվս այլնի, ՀՀ քրեական օրենսգրքի 38-308-րդ հոդվածի 2-րդ մասով որպես մեղադրյալ ներգրավվել է նաև Ա. Հովսեփյանը: Նկատի ունենալով, որ ՀՀ Արագածոտնի մարզի Բյուրական համայնքին պատկանող հիշյալ հողատարածքները օտարվել են օրենքով սահմանված կարգի խախտմամբ՝ ՀՀ գլխավոր դատախազության ՀՀ հակակոռուպցիոն կոմիտեում մինչդատական վարույթի օրինականության նկատմամբ հսկողության վարչության պետ Ա.Մարտիրոսյանը գրություն է ուղարկել ՀՀ Արագածոտնի մարզի Աշտարակ խոշորացված համայնքի ղեկավար Թ. Շահվերդյանին՝ իր իրավասության սահմաններում ձեռնարկելու գործող օրենսդրությամբ նախատեսված միջոցառումները՝ նշված հողատարածքները համայնքին վերադարձնելու նպատակով:

Լրատվամիջոցներից մեկը ապրիլի 14-ին տարածած «Ստեփանակերտի քաղաքապետն ու Արցախի նախագահը վիճե՞լ են» վերտառությամբ նյութում ի մասնավորի նշել է, թե Ստեփանակերտի քաղաքապետը վերջին շրջանում շատ լարված հարաբերություններ ունի ԱՀ նախագահի հետ, անգամ վիճաբանել են: Ստեփանակերտի քաղաքապետ Դավիթ Սարգսյանը, ի պատասխան այս պնդման ֆեյսբուքյան իր էջում գրառում է կատարել՝ նշելով, որ որպես Ստեփանակերտի քաղաքապետ՝ վստահեցնում է, որ այդ պնդումը իրականության հետ ոչ մի աղերս չունի: «Ինչ վերաբերում է որպես այդ պնդման ապացույց ներկայացված փաստին, թե Մարտակերտում շրջանի պատասխանատուների հետ նախագահի հանդիպմանը ես ներկա չէի, մեղմ ասած՝ լուրջ չէ: Խոստովանեմ, որ չեմ մասնակցել նաև Ասկերանում նույն ձևաչափով կայացած հանդիպմանը, այն պարզ պատճառով, որ այդ հանդիպումները նվիրված էին կոնկրետ շրջանների և այնտեղ առկա խնդիրներին, որոնք Ստեփանակերտի հետ որևէ առնչություն չունեն: Փոխարենը, որպես Ստեփանակերտի քաղաքապետ, մասնակցում եմ այն հանդիպումներին ու քննարկումներին, որտեղ արծարծվում են նաև մայրաքաղաքին առնչվող թեմաներ: Դրանցից վերջինը Արայիկ Հարությունյանի նախագահությամբ տեղի ունեցած կառավարության նիստն էր ապրիլի 9-ին և նույն օրը նախագահի նստավայրում կայացած խորհրդակցությունը՝ պարենային անվտանգության թեմայով»,-նշել է քաղաքապետը՝ հավելելով, որ ակնկալում է վերը նշված տեղեկությունը հրապարակած լրատվամիջոցից դրա հերքում և հավելել, որ ինչպես պատերազմից առաջ, պատերազմի ժամանակ, այնպես էլ այսօր Ստեփանակերտի իշխանության օրակարգում չպակասող մարտահրավերների դեմ միասնական ուժերով արդյունավետ պայքարն է:

Ապրիլի 15-ին հանրապետությունում արձանագրվել է կորոնավիրուսային հիվանդության 8 նոր դեպք: Կատարվել է 3171 թեստավորում, առողջացել՝ 27 քաղաքացի: Այսպիսով, հաստատվել է կորոնավիրուսային հիվանդության ընդհանուր 422 729 դեպք, որոնցից 410 420-ը՝ առողջացած: Փաստացի բուժում է ստանում 2008 պացիենտ: Ընդհանուր առմամբ, կորոնավիրուսի հետևանքով մահվան 8621 դեպք է արձանագրվել: Այլ հիվանդության պատճառով մահվան դեպքերի ընդհանուր թիվը 1680 է: Ընդհանուր կատարվել է 3 011 012 թեստավորում։

Այսօր՝ ապրիլի 14-ին, ողբերգական դեպք է տեղի ունեցել Երևանում: Ժամը 18:20-ի սահմաններում «Դալմա Գարդեն Մոլ»-ից դեպի Ծիծեռնակաբերդի հուշահամալիր տանող ճանապարհահատվածում MTR մակնիշի AC 455 համարանիշի երկանիվ մոտոցիկլը բախվել է բազալտե եզրաքարին և կողաշրջվել: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 2 հոգի մարմնական վնասվածքներով տեղափոխվել են «Արմենիա» բժշկական կենտրոն: © shamshyan.com https://shamshyan.com/hy/article/2022/04/14/1211256/

ՀՅԴ Բյուրոն Արցախի շուրջ ստեղծված իրավիճակի վերաբերյալ հանդես է եկել հայտարարությամբ, որում ասվում է․ «2022թ. ապրիլի 13-ին ՀՀ ԱԺ ամբիոնից իր ելոյթի ժամանակ Նիկոլ Փաշինյանի ինքնախոստովանական ցուցմունքները և Հայաստան-Ադրբեջան, Հայաստան-Թուրքիա հարաբերությունների, Արցախի ու Հայաստանի Հանրապետության անվտանգային խնդիրների վերաբերյալ հայտնած դիրքորոշումները, փաստերի եւ իրողությունների նենգափոխումները վերջնականապես բացահայտեցին վարչապետի պաշտոնը զբաղեցնողի ու իր վարչախմբի քաղաքական եւ բարոյական սնանկությունը։ Այլևս կասկածից վեր է, որ Նիկոլ Փաշինյանը կայացրել է Արցախը Ադրբեջանին հանձնելու և թուրք-ադրբեջանական տանդեմի պահանջները բավարարելու ազգակործան որոշում: Սակայն ո՛չ Նիկոլ Փաշինյանը, ո՛չ էլ որևէ քաղաքական ուժ կամ անձանց խումբ չունի որևէ մանդատ Արցախի և արցախահայության փոխարեն կայացնելու նրանց ճակատագրի վերաբերյալ նման որոշում: Ներկայացվող «խաղաղության» օրակարգը իրականում միտված է վարչախմբի իշխանությունը երկարաձգելուն եւ հանգեցնելու է Արցախի և Հայաստանի համար լրջագույն սպառնալիքների, անվտանգային նոր մարտահրավերների, նոր պատերազմի, նոր կորուստների, նոր զոհերի ու նոր կապիտուլյացիայի։ Արցախյան վերջին պատերազմի ընթացքում եւ դրանից հետո իշխանությունների ապաշնորհ ու ձախող վարքագիծը եւ տեղի ունեցող գործընթացները դրանց վառ վկայությունն են։ Ստեղծված ծանրագույն իրավիճակում բեկում կարող է առաջանալ, երբ համազգային ներուժի մեկտեղմամբ դիմադրություն ցույց տրվի դավադիր պայմանավորվածություններով ու սպառնալիքներով հայ ժողովրդին պարտադրվող օրակարգերին: Հայաստանի գործող իշխանության հեռացումը և բանակցողի փոփոխությունը իրավիճակից դուրս գալու առաջին քայլն է: Առ այդ, 1. Միջազգային հանրության, այդ թվում ԵԱՀԿ Մինսկի խմբի համանախագահ երկրների ուշադրությանն ենք հանձնում, որ Նիկոլ Փաշինյանիկողմից ուղղակի կամ անուղղակի, բանավոր կամ գրավոր ձևով Արցախը Ադրբեջանի ենթակայությանը հանձնելու որևէ հանձնառություն լեգիտիմ չէ եւ առ ոչինչ է: Արցախի ժողովրդի` իր բնօրրանում ինքնորոշվելու իրավունքն ամրագրված է միջազգային իրավական ակտերով, ինչը ԵԱՀԿ Մինսկի խմբի շրջանակներում, 2007 թվականից, որպես սկզբունք դրված է արցախյան հակամարտության խաղաղ կարգավորման հիմքում: 2. Ուղերձ ենք հղում հայ ժողովրդին դիմագրավելու ներքին ու արտաքին բոլոր սպառնալիքներին, չհուսահատվելու, չհամակերպվելու, լինելու միասնական, հավատալու սեփական ուժերին ու պայքարելու՝ հանուն հայ ազգի իրավունքների եւ շահերի: Տոկուն եւ անկոտրում արցախահայությանը վստահեցնում ենք որ հայ ազգը զորավիգ է իր արդա՛ր պայքարին։ 3. Հավատարիմ իր առաքելությանը՝ Դաշնակցությունը իր համահայկական կառույցով վճռական է այս պայքարում լինելու և՛ առաջամարտիկ և՛ զինվոր: Միաժամանակ հայտնում ենք մեր պատրաստակամությունը համագործակցելու բոլոր նրանց հետ, ովքեր պատրաստ են պայքարելու հանուն արժանապատիվ ու անվտանգ Հայաստանի ու Արցախի»:

Ամերիկայի նախագահի էքսցենտրիկ դրսևորումները շարունակվում են. Հյուսիսային Կարոլինայի գյուղատնտեսական ակադեմիայում ելույթից հետո ԱՄՆ առաջնորդը ձեռքը մեկնել է դատարկ տարածության վրա, հետո անմիջապես չի հասկացել, թե որ կողմն է ամբիոնից ելքը։ Կոնգրեսական Մարջորի Թեյլոր-Գրինը բավական կտրուկ է արձագանքել միջադեպին՝ իր միկրոբլոգում գրելով, որ «աներևակայելի ամաչում է» նման նախագահից։

Իրադարձություններն արագանում են՝ նախօրեին ՀՀ ԱԺ ընդդիմադիր պատգամավորներին թույլ չէին տվել մտնեն Արցախ, ապա ՀՀ խորհրդարանում Նիկոլ Փաշինյանը ելույթ ունեցավ եւ հստակ հայտարարեց, որ Ադրբեջանի հետ կնքելու են խաղաղության պայմանագիր, եւ կնքելու են Ադրբեջանի թելադրած պայմաններով։ Նաեւ երեկվա ու այսօրվա ելույթներում հստակ զգացվում է ՀՀ վարչապետի պաշտոնը զբաղեցնողի վախը պատերազմից եւ իր համար անցանկալի այլ զարգացումներից։ Արցախի նախագահն է այս օրերին հանդիպումներ ունենում, իսկ երեկ մի հանդիպման ժամանակ ասել է, որ ռուսները չեն հեռանալու Արցախից եւ Արցախը պահելու է դե-ֆակտո անկախությունը եւ փորձելու է հասնել դե-յուրե որեւէ կարգավիճակի, որը կարող է լինել Ռուսաստանի հետ զուգահեռ հարաբերությունների մի տարբերակ։  Այս ամենի ֆոնին ուշագրավ է, որ երեկ Արցախ է շտապել ՀՀ ԱԱԾ տնօրեն Արմեն Աբազյանը՝ ընդդիմադիրները Երեւան վերադառնալու ճանապարհին դեմ-դիմաց բախվել են նրա մեքենայի հետ եւ տեսել են, թե ինչպես է նա հատում Արցախի սահմանը։ Մենք ընդամենը կարող ենք ենթադրություններ անել․ կամ՝ Նիկոլ Փաշինյանը բանագնաց է ուղարկել Արցախ, որպեսզի նա տեղում ուսումնասիրի իրավիճակն ու զեկուցի իրեն, կամ՝ ԱԱԾ տնօրենը մեկնել է Արցախում որոշակի գործողություններ իրականացնելու նպատակով, կամ էլ հնարավոր է՝ գնացել է ռուս խաղաղապահների հրամանատարության հետ հանդիպելու համար։  Ամբողջական հոդվածը կարող եք կարդալ այս հասցեով՝ : https://hraparak.am/post/5aa78650a34eb44849a397bb2280260f © 2008 - 2021 «Հրապարակ օրաթերթ»

«Շատ վաղուցվա մի անեկդոտ եմ հիշում, որ իսկը Նիկոլ Փաշինյանի հագով է։ «Գողը մտնում է մարդամեկի տուն, տեսնում, որ ոչինչ չկա տանելու։ Աջ է նայում, ձախ է նայում, բան չկա։

Հայաստանի իշխանություններին հորդորում եմ՝ դադարեցնել այդ ահաբեկությունը, պատերազմով վախեցնելը՝ թե Հայաստանի, թե Արցախի, թե աշխարհասփյուռ ժողովրդին․ ԱՀ ԱԺ արտահերթ նիստի ժամանակ իր ելույթում ասաց ՀՅԴ Արցախի Կենտրոնական կոմիտեի ներկայացուցիչ, «Հայ Յեղափոխական Դաշնակցություն» խմբակցության պատգամավոր Արթուր Մոսիյանը։ Ըստ Արթուր Մոսիյանի՝ ամիսներ առաջ ԱՀ ԱԺ պատգամավորները մի շարք հանդիպումներ են ցանկացել ունենալ միջխորհրդարանական հանձնաժողովի ֆորմատով, սակայն հանձնաժողովը չի կայացել եւ իրենք ուղեւորվել են Երեւան, հանդիպել ԱԺ նախագահի եւ մի քանի պատգամավորների հետ. «Ես հարց ուղղեցի ԱԺ նախագահ Ալեն Սիմոնյանին, ասելով, կարգավիճակ ասելով ձեր իշխանությունն ի՞նչ է հասկանում եւ կարո՞ղ է մի օր ասեք՝ Ադրբեջանի կազմում, Ալեն Սիմոնյանը վիրավորված ասաց՝ մեզ ինչի՞ տեղ եք դնում, իհարկե, խոսքը վերաբերում է կամ անկախացմանը կամ Հայաստանին միացմանը, հո չենք ասելու Ադրբեջանի կազմում։ Փաստորեն վարչապետի երեկվա ելույթից եւ իջեցրած հրահանգի շնորհիվ որոշ պատգամավորների ելույթներից հետո պարզ դարձավ մի պարզ ճշմարտություն, էն ինչ մենք մտածում էինք, դժբախտաբար, դարձավ իրականություն։ Ես հավատացնում եմ, որ այդ տեսակը մեր ժողովրդի մեջ շատ չէ, չի կարող հայ ազգի մեջ այդ տեսակը լինել մեծամասնություն։ Հայաստանի իշխանություններին հորդորում եմ՝ դադարեցնել այդ ահաբեկությունը, պատերազմով վախեցնելը՝ թե Հայաստանի, թե Արցախի, թե աշխարհասփյուռ ժողովրդին»։ Մոսիյանի խոսքով՝ արդեն վերջին պատերազմից հետո թե՛ Փաշինյանը, թե՛ Ալիեւը արցախցիների հետ խոսում են նույն լեզվով. «Նայելով այդ 5 կետերին՝ տեսնում ենք, որ ոչ միայն վտանգվում է մեր բազմահազար զոհերի գնով ձեռք բերված անկախությունը, այլ նաեւ կետ կա, որ ապագայում Հայաստանի Հանրապետությունը երբեւէ որեւէ պահանջ չի կարող ներկայացնել։ Այս աղետալի քայլով Նիկոլ Փաշինյանը եւ իր վարչախումբը ոչ միայն զրոյացնում են մեր սերունդների, բազմահազար զոհերի, վիրավորների թափած արյան գինը, այլ նաեւ ապագա սերունդների համար է որոշում՝ այդ կետն ամրագրելով։ Իմ դաստիարակությունն ինձ թույլ չի տալիս նույն հարցը տալ Ալեն Սիմոնյանին, ես կխնդրեի, որ ինքը պատասխաներ այդ հարցին՝ իրենք իրենց ինչի՞ տեղ են դրել, որ մի խմբակով ուզում են որոշել մի ամբողջ ժողովրդի ճակատագիր թե Արցախում, թե Հայաստանում»։ «Արցախը բեռ չէր, Արցախը զրահաբաճկոն էր, որը միտումնավոր կամ դավադրաբար հանելով՝ խոցելի դարձրիք թե՛ Արցախը, թե՛ Հայաստանը: Հետ կանգնեք, քանի դեռ ուշ չէ»,- ելույթի ավարտին ասաց Արթուր Մոսիյանը։

Արցախը չի կարող լինել Ադրբեջան կոչվող արհեստածին կազմավորման շրջանակներում, քանի որ դրանով սկիզբ կդրվի Հայաստանի կենսունակ պետականություն ունենալու հազարամյակների ծրագրի փաստացի ոչնչացման մեխանիզմի գործարկմանը և լավագույն դեպքում «Էրմանիստան» ազգագրական ռեզերվացիայի ստեղծմանը։ Այս մասին Տելեգրամում գրում է իրանագետ Վարդան Ոսկանյանը։ «Անմտության հետ սահմանակցող այն «մռայնությունը», որ Բաքվի բարբարոսական վարչախումբն իբր կհանգստանա, ստանալով մեր հայրենիքի մի հատվածը, չի դիմանում որևէ տրամաբանական քննության՝ հաշվի առնելով նաև այն, որ արդեն իսկ ձեռք գցելով իր երազանքի առավելագույնը՝ 7 շրջանները և Հադրութն ու Շուշին, արհեստածին այս գոյացությունը հիմա հավակնում է մնացյալ Արցախին և հող նախապատրաստում Սյունիքի համար՝ ստեղծելով ինչ-որ «Արևելյան Զանգեզուր» բռնազավթված տարածքներում։ Ուստի, Արցախից հրաժարումով Հայաստանի Հանրապետության համար գոյաբանական մարտահրավերները ոչ թե ավարտվելու, այլ միայն ավելանալու են՝ այն էլ վատթարագույն ստարտային պայմաններով»,- գրել է Ոսկանյանը։

Նախագահի հրամանագրով սահմանվել են ԱՀ տարածքում հայտարարված ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները Արցախի Հանրապետության նախագահ Արայիկ Հարությունյանն ստորագրել է հրամանագիր, համաձայն որի՝ սահմանվել են Արցախի Հանրապետության տարածքում հայտարարված ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները, որոնք շարադրված են ստորև. «1. Արցախի Հանրապետության տարածքում հայտարարված ռազմական դրության իրավական ռեժիմի ընթացքում, ելնելով պետական և հասարակական արտաքին և ներքին անվտանգության ապահովման անհրաժեշտությունից, ռազմական բնույթի տեղեկատվության, պետական անվտանգությանը վերաբերող ոչ ռազմական բնույթի տեղեկատվության, Արցախի Հանրապետության սահմանային իրավիճակին վերաբերող տեղեկատվության և հրապարակումների, մարտական տեխնիկայի, զինված ուժերի և այլ զորքերի վերաբերյալ հրապարակումների, տեղեկատվական նյութերի, հարցազրույցների, հաղորդումների և դրանց հետ անմիջականորեն առնչվող այլ տեղեկությունների (այսուհետ բոլորը միասին` հաղորդում) հրապարակային տարածումը, փոխանցումը, ներառյալ ինտերնետային կայքերում և սոցիալական ցանցերում դրանց հրապարակումների ձևով (այսուհետ՝ հրապարակում), կատարվում է բացառապես պետական մարմինների կողմից տրամադրված կամ հրապարակված պաշտոնական տեղեկատվության (այսուհետ` պաշտոնական տեղեկատվություն) հղումով՝ ամբողջությամբ արտացոլելով պաշտոնական տեղեկատվությունը (առանց խմբագրման): 2. Պետական և տեղական ինքնակառավարման մարմինների և պաշտոնատար անձանց` ռազմական դրության իրավական ռեժիմի և պետական անվտանգության ապահովմանն առնչվող գործողությունները (այդ թվում` ելույթները, հրապարակումները) առերևույթ կեղծված ներկայացվող և (կամ) հերքող հաղորդումների հրապարակումն արգելվում է: 3. Արգելվում է Արցախի Հանրապետության պաշտպանունակության ու անվտանգության դեմ ուղղված քարոզչությունը: 4. Հաղորդումների հետ կապված պաշտոնական հայտարարություններով­ հանդես են գալիս Արցախի Հանրապետության Նախագահը, Արցախի Հանրապետության համապատասխան ոլորտի պետական լիազորված մարմինները, իսկ այլ անձինք` Արցախի Հանրապետության Նախագահի հանձնարարությամբ: 5. Հաղորդումները հրապարակվում են Արցախի Հանրապետության Նախագահի մամուլի քարտուղարի կամ Արցախի Հանրապետության Նախագահի աշխատակազմի տեղեկատվության գլխավոր վարչության կամ համապատասխան ոլորտի պետական լիազորված մարմինների ղեկավարների կամ լիազորված ներկայացուցիչների միջոցով։ 6. Պաշտոնատար անձինք և պետական կառավարման մարմինների ներկայացուցիչներն իրենց լիազորությունների շրջանակներում կարող են հանդես գալ հաղորդումների վերաբերյալ հայտարարություններով­ և մեկնաբանություններով­ միայն Արցախի Հանրապետության Նախագահի աշխատակազմի տեղեկատվության գլխավոր վարչության հետ համաձայնեցված դիրքորոշումներին համապատասխան: 7. 1-3-րդ կետերով նախատեսված կանոնների պահպանման նկատմամբ հսկողություն է իրականացնում Արցախի Հանրապետության ոստիկանությունը: Արցախի Հանրապետության ոստիկանությունն իրավասու է անհրաժեշտ միջոցներ ձեռնարկել ապահովելու հրապարակված հաղորդումների և տեղեկությունների վերացումը, իրականացնելու տպագրող սարքերի, ռադիոհեռարձակող, ձայնաուժեղացնող տեխնիկական միջոցների, բազմացնող տեխնիկայի ժամանակավոր առգրավում կամ կալանք»: Սահմանված կանոնների խախտումը ենթադրում է և՛ վարչական, և՛ քրեական պատասխանատվություն: Մասնավորապես, Վարչական իրավախախտումների վերաբերյալ օրենսգրքի 182.5-րդ հոդվածի հետևյալ մասերով նախատեսված են՝ «5. Լրատվական գործունեություն իրականացնողի կողմից ռազմական դրության ընթացքում տեղեկությունների հրապարակման կամ տարածման կանոնները խախտելը, լրագրողի կողմից հավատարմագրման հատուկ կարգը չպահպանելը, կապի միջոցներից օգտվելու հատուկ կանոնները խախտելը` առաջացնում են տուգանքի նշանակում` սահմանված նվազագույն աշխատավարձի յոթհարյուրապատիկից մինչև հազարապատիկի չափով: 6. Լրատվական գործունեություն չիրականացնող անձանց կողմից ռազմական դրության ընթացքում տեղեկությունների հրապարակման կամ տարածման կանոնները խախտելը կամ կարծիքի արտահայտման ազատության սահմանափակման կանոնները խախտելը՝ առաջացնում է տուգանքի նշանակում` սահմանված նվազագույն աշխատավարձի երեքհարյուրապատիկից մինչև յոթհարյուրապատիկի չափով: 7. Սույն հոդվածի 5-րդ և 6-րդ մասերով նախատեսված տույժերին ենթարկվելուց հետո՝ անհապաղ, ռազմական դրության ընթացքում սահմանված տեղեկությունների հրապարակման կամ տարածման կանոնների խախտմամբ տարածված հրապարակումը չվերացնելը` առաջացնում է տուգանքի նշանակում` լրատվական գործունեություն իրականացնողի նկատմամբ` նվազագույն աշխատավարձի հազարապատիկից մինչև հազարհինգհարյուրապատիկի չափով, իսկ լրատվական գործունեություն չիրականացնող անձանց նկատմամբ` յոթհարյուրապատիկից մինչև հազարապատիկի չափով»: Իսկ Քրեական օրենսգրքի 321.4-րդ հոդվածը սահմանում է՝ «1. Ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը, որն էական վնաս է պատճառել անձանց կամ կազմակերպությունների իրավունքներին կամ օրինական շահերին կամ հասարակության կամ պետության օրինական շահերին՝ պատժվում է տուգանքով՝ նվազագույն աշխատավարձի երկուհազարապատիկից երեքհազարապատիկի չափով, կամ ազատազրկմամբ՝ առավելագույնը երկու տարի ժամկետով»: [ԱՀ նախագահի աշխատակազմի տեղեկատվության գլխավոր վարչություն]

Գորիս-Կապան միջպետական ճանապարհի 21 կմ-անոց հատվածում ադրբեջանցիների օկուպացման տակ գտնվող հատվածում արդեն երկու ամիս է, ինչ փշալար է քաշվել, իսկ բետոնե արգելապատնեշները ճանապարհը փակելուց ի վեր եղել է։ Այս մասին ArmDaily.am-ի հետ զրույցում ասաց Սյունիքի մարզի Գորիս համայնքի Շուռնուխ բնակավայրի վարչական ղեկավար Հակոբ Արշակյանը։ «Ամենասկզբում այդ ճանապարհը, որ փակել էին, դրանից հետո մեկ ամիս պարսիկներն այդ ճանապարհից օգտվում էին, հետո տեսան, որ թալանում են իրենց՝ հատկապես Socar-ի այդ հատվածում բացված բենզալցակայանից պարսիկներն օգտվում էին, այնտեղ լիցքավորում էին, հետո Կապանում վաճառում։ Հետո մեր սահմանապահները արգելեցին դա։ Ինչքան որ Մեղրիից մտել են, հաշվարկն արեցին, թե որքան սոլյարկայով են, չթույլատրեցին այլևս ադրբեջանական բենզալցակայանից լիցքավորել հետո վերավաճառել, բացի այդ նաև թանկ մաքսատուրքերը ևս դեր խաղացին, որ նրանք էլ հրաժարվեն ճանապարհի այդ հատվածից օգտվել ու այժմ երթևեկում են այլընտրանքային ճանապարհով»,-ասաց Արշակյանը։ Շուռնուխ վարչական շրջանի ղեկավարը նշեց, որ հատուկենտ մեքենաներ կարող են դեռևս օգտվել այդ ճանապարհից, ովքեր պատրաստ են այդ մաքսատուրքը վճարել։ Մեզ հետ զրույցում Գորիս համայնքի բնակիչը, ով չցանկացավ ներկայանալ, ասաց, որ ճանապարհին ադրբեջանցիների կողմից մաքսակետ դնելուց հետո ընդամենը մեկ ամիս են կարողացել օգտվել այդ ճանապարհից։ «Մի հատ ԱԽՔ կար, որ ասում էր՝ բոլորը կարող են օգտվել, այ էդ իր ասածից ընդամենը մի ամիս , ամիսուկես հետո դադարել են օգտվել էդ ճանապարհից։ Հետո մի տրամաբանական բան ասեմ, լավ ռուսը նայեք՝թողեց, բա որ ադրբեջանցին ասի, տես քո ավտոյի մեջից այս գրանատն եմ հանել կամ էլ խմած էիր՝ մեզ հայհոյել ես։ Բա էդ դեպքում մեր տերն ով է լինելու՝ դա էլ էր պատճառ, որ մարդիկ ստիպված այլընտրանքային ճանապարհով են երթևեկում։ Իրենք էդ տարածքում ամեն ինչ կարող են անել, մարդկանց էլ տանեն՝ իրենց ձևերով մշակեն ու իրենց ուզածը կասեն մարդիկ ասեն»,-ասաց Գորիսի համայնքի մեր զրուցակիցը։

Հայաստանը ռուսական գազի համար վճարումները կատարում է ռուբլով, РБК-ին հայտնել է ՀՀ էկոնոմիկայի նախարար Վահան Քերոբյանը։ «Պետք է շարժվել դեպի ազգային արժույթներ: Ռուսական կողմից այս ուղղությամբ առաջընթաց կա: Որքան գիտեմ, վերջին մի քանի վճարումը ռուբլով են եղել, բայց համապատասխան փոխարժեքով», - ասել է նա։ Նախարարը նաև նշել է, որ գնագոյացումը տեղի է ունենում դոլարով, սակայն վճարումը կատարվում է ռուբլով։ «Գազպրոմ»-ի պաշտոնական ներկայացուցիչ Սերգեյ Կուպրիյանովը նշել է, որ Հայաստան գազի մատակարարման վերաբերյալ «Գազպրոմ»-ի պայմանագիրը արդեն մի քանի տարի է` թույլ է տալիս գազի դիմաց վճարել ռուբլով, և այդ հնարավորությունն օգտագործվում է:

«Ժողովուրդ» օրաթերթը գրում է. «Արցախի ապագայի հետ կապված վարչապետ Նիկոլ Փաշինյանի հրապարակային խոստովանություններից հետո ընդդիմությունը կարծես ընդհատակ է անցել. մի մասն օրեր առաջ գնաց Արցախ, սակայն նրանց թույլ չտվեցին սահմանն անցնել, մի մասը մարզերում հանդիպումներ է ունենում: Այս միջադեպից հետո տեղեկություն չկա՝ ինչով է ընդդիմությունը զբաղված մեր երկրի համար օրհասական այս օրերին։ «Ժողովուրդ» օրաթերթի տեղեկություններով՝ ընդդիմությունը ծրագրեր է մշակում՝ կոշտ քայլեր իրականացնելու, եւ առաջիկայում ռեալ գործողություններ են սպասվում Հայաստանում եւ Արցախում։ Երեկ Արցախի խորհրդարանի կողմից ընդունված հայտարարությունը՝ ուղղված Հայաստանի խորհրդարանին եւ բոլոր ուժերին, նշան էր, որ արցախցին ունի Հայաստանի կարիքը, եւ ընդդիմությունը որոշել է սպասարկել Արցախի շահը՝ ծրագրելով արմատական գործողություններ»:

Հայաստանի խորհրդարանը երեկ Միլի մեջլիս էր հիշեցնում, ուր Նիկոլ Փաշինյանն ու իր ուսապարկերը, իրարից խոսք խլելով, հակահայկական ելույթներ էին ունենում` գերազանցելով հայատյաց ադրբեջանցիներին։ Փաշինյանը կրկին խոստովանություններ արեց: Մասնավորապես` խոստովանեց, որ ոչ թե ելույթից առաջ է մտածում իր ասելիքի մասին, այլ ելույթից հետո: Ասաց` երեկվանից մտածում եմ, թե ինչ էր նշանակում իմ ելույթը, եւ հասկացել եմ, որ «ճանապարհ եմ բացում... որ մեր ժողովրդին դուրս բերեմ մատաղացու գառի կարգավիճակից»։ Իսկ մինչ այդ ուսապարկերը «շեֆի» գովքն էին անում` շնորհակալություն հայտնում նրա ելույթի համար՝ դրանով իսկ ստանձնելով կոլեկտիվ պատասխանատվություն` Արցախն ամբողջությամբ Ադրբեջանին հանձնելու վերջին դավաճանական ակտում։ Հիշեցնենք, որ նախօրեին խորհրդարանի ամբիոնից վարչապետ Փաշինյանի կողմից մի շարք վտանգավոր ձեւակերպումներ էին հնչել, խոստովանություններ արվել: Օրինակ. «Այսօր միջազգային հանրությունը մեզ կրկին ասում է՝ մի փոքր իջեցրեք Լեռնային Ղարաբաղի կարգավիճակի հարցում ձեր նշաձողը եւ միջազգային մեծ կոնսոլիդացիա կապահովեք Հայաստանի եւ Արցախի շուրջ: Հակառակ դեպքում, ասում է, խնդրում ենք մեր վրա հույս չդնել, մենք չենք կարող ձեզ օգնել»։ Հաջորդ օրը ՔՊ-ականներն իրենց ելույթներում փորձում էին արդարացնել, որ ճիշտը դա է, ու Նիկոլ Փաշինյանը վայրկյան առաջ պետք է Արցախը նվիրի Ադրբեջանին, որ մենք խաղաղ ապրենք։ Բազում իշխանությունների օրոք գործիք աշխատած Վիգեն Խաչատրյանը, օրինակ, նկատեց. «Ծանրագույն երկընտրանքի առջեւ ենք կանգնած, ըստ իս՝ պետք է ողջունել վարչապետի անկեղծ մտորումները ժողովրդի հետ»։ Ապա հայտարարեց, թե 1996 թվականին ծնված գաղափարը, որ Արցախն Ադրբեջանի կազմում ապագա չունի, ճիշտ գաղափար չի եղել։ «1988 թվականի շարժումը բերեց նրան, որ Դաշտային Ղարաբաղը հայաթափվեց, եւ 400-500 հազար հայեր չկարողացան շարունակել կյանքն իրենց պատմական հայրենիքում։ Վերջապես բերեց նրան, որ մենք ունեցանք ԼՂԻՄ-ի մի զգալի մասի կորուստ, որտեղ այլեւս հայեր չեն ապրում: Որտե՞ղ մենք պետք է կանգ առնենք, որտե՞ղ պետք է հասկանանք, թե մեր նպատակը որն է՝ հերոսաբար ոչնչանա՞լ, թե՞ ապրել, զարգանալ ու հեռանկար ունենալ: Երբ Լեւոն Տեր-Պետրոսյանը շեշտում է, որ 1997 թվականին չգնացինք հարցի լուծմանը, որովհետեւ քաղաքացիական պատերազմ կարող էր լինել, ես երբեք այդ տեսակետը չեմ կիսել, մենք չգնացինք այդ լուծմանը, որովհետեւ որպես իշխանություն՝ կորցրել էինք վստահությունը հասարակության մեջ»,- ասաց նա: Ըստ պատգամավորի` խորհրդարանական մեծամասնությունից է կախված՝  խաղաղություն հաստատելու վարչապետի քաղաքականությունը կպսակվի՞ հաջողությամբ, թե՞ ոչ: Նրա ելույթից հետո ԱԺ նախագահ Ալեն Սիմոնյանը շնորհակալություն հայտնեց Վիգեն Խաչատրյանին` «ճիշտ խոսքերի համար»: Կենացները քաղցրացրեց Գուրգեն Արսենյանը՝ խրատելով․ «Թուրք ատելը չպետք է լինի հայկականության դրսեւորում»։ Հովիկ Աղազարյանն էլ ասաց. «Մենք Ադրբեջանի տարածքային ամբողջականության հետ կապված խնդիրներ չունենք, մենք ունենք մի խնդիր, որ Արցախի ժողովուրդը, փաստորեն, ինքնորոշվում է, եւ մենք պետք է ամեն ինչ անենք, որ դրա արդարացի ու արագ լուծման հասցնենք»։ Փաշինյանին՝ «համարձակության» համար, շնորհակալություն հայտնեց նաեւ նոր Հայաստանի թիվ մեկ գործարար Խաչատուր Սուքիասյանը։ Նա հարց բարձրացրեց՝ ՀՀ երկրորդ նախագահ Ռոբերտ Քոչարյանն ու ՀՀ երրորդ նախագահ Սերժ Սարգսյանն ինչո՞ւ Ղարաբաղի խնդիրը չլուծեցին․ «Լավ, դուք եղել եք պաշտպանության նախարար, ինչո՞ւ չգրավեցիք ամբողջ տարածաշրջանը, որ այսօր հանգիստ մնային, սա անընդունելի է, ու ես, երբ նշեցի, որ պետք է համարձակություն ունենալ ու հասարակությանն ասել դառը ճշմարտությունը, դա նրա համար է, որ երբ դու ճշմարտությունը հասարակությանն ասում ես, հասարակությունը գտնում է, գիտակցում է ու սկսում է պաշտպանել տվյալ իշխանությանը»։ Եզրափակիչ ելույթով հանդես եկավ նաեւ Փաշինյանը, ով հերթական անգամ մանիպուլացրեց իրականությունը, փորձեց արդարացնել իր նախկին մտքերն ու ապագա անելիքները, անհայտ թիրախների վրա հարձակվեց ու դերասանական հմտությունները գործի դրեց։ Ընդամենը մեկ օր առաջ նա նույն ամբիոնից հայտարարել էր, թե միջազգային հանրությունը մեզնից ակնկալում էր, որ տարբեր կոնֆիգուրացիայով Ադրբեջանին հանձնենք 7 հայտնի շրջանները եւ իջեցնենք Արցախի կարգավիճակի համար մեր սահմանած նշաձողը, ինչպես նաեւ ասել էր․ «Հանձնելով 7 շրջանները՝ գուցե կփրկեի հազարավոր կյանքեր, իսկ չհանձնելով՝ փաստորեն, հազարավոր զոհերի հանգեցրած որոշումների հեղինակ դարձա»: Հաջորդ օրն արդեն հիշեց «դժբախտ ու դժգույն» Շուշին, ասաց, թե 44-օրյա պատերազմը Շուշիի համար է եղել, այսինքն` «միայն 7 շրջանները չէին»։ Մինչդեռ ամենաբարձր մակարդակներից բազմաթիվ անգամներ ասվել է, որ երբեք Շուշիի հարցը չի եղել օրակարգում, այն հայտնվել է 44-օրյայի կեսերին` հոկտեմբերի 19-ից հետո։  Հասկանալով, որ նախօրեին չափն անցել է՝ խոստովանելով, որ ինքն է զոհերի թիվ մեկ պատասխանատուն, Փաշինյանը երեկ կրկին դրամատիկ զեղումներով հանդես եկավ՝ փորձելով համոզել, որ ինքը եկել է ճշմարտությունն ասելու եւ մեր արժանապատվությունը վերականգնելու, ինչը, որքան հասկացանք, արտահայտվելու է Ադրբեջանի բոլոր պահանջները կատարելու մեջ: Մի ղեկավար, որը 44 օրվա ընթացքում մի քանի սերունդ զոհաբերեց միայն հանուն այն բանի, որ իրեն դավաճան չասեն, այսօր հայտարարում է, թե պետք է թույլ չտանք, որ մեր փոխարեն ուրիշները որոշում կայացնեն, եւ իր առաքելությունն է՝ հայ ժողովրդին «մատաղացու գառան կարգավիճակից» դուրս բերելը: «Ես այսօր ասում եմ՝ Հայաստանն ինքնիշխան պետություն է, մենք պետք է բան որոշելու իրավունքը վերադարձնենք մեզ, որովհետեւ մենք երկիր ենք, մենք ախոռ չենք, մենք քաղաքացի ենք, մենք մատաղացու գառ չենք, որ տարբեր տեղերում որոշեն, թե ոնց ու ինչքան մեզ մորթեն ու ինչքան մեզ ներեն... մենք ունենք ինքնասիրություն ու թույլ չենք տա մեր իրավունքը խլել մեզնից»։ Ամբողջական հոդվածը կարող եք կարդալ այս հասցեով՝ : https://hraparak.am/post/51852d7564731bd93826706335cdca68 © 2008 - 2021 «Հրապարակ օրաթերթ»

«Հրապարակ» թերթը գրում է․ «Գրվեց, որ ԱԺ աշխատակազմը 3 հատ նոր Toyota RAV4 մակնիշի մեքենա է որոշել ձեռք բերել, որոնք պետք է ուղեկցեն ԱԺ նախագահի մեքենային: Սակայն ԱԺ նախագահի մեքենային ընդամենը 2 ավտոմեքենա է ուղեկցում, երրորդ RAV4-ը, պարզվեց, հատկացվելու է ԱԺ աշխատակազմի ղեկավարին, քանի որ նա այս պահին «յոլա է գնում» ընդդիմադիր պատգամավոր Արմեն Գեւորգյանին հատկացված Toyota Camry-ով, որը ևս հնամաշ է։ Գևորգյանը, ինչպես նաև Վահե Հակոբյանն ու Սեյրան Օհանյանը, հրաժարվել են իրենց հատկացված մեքենաներից` երթևեկում են անձնական մեքենաներով։ Մեզ ասացին, որ ԱԺ գարաժում առկա մեքենաները հիմնականում մաշված են, կարիք կա նորերը գնելու, բայց ամեն անգամ աղմուկ է բարձրանում, ուստի խուսափում են գնում անելուց։ ԱԺ աշխատակազմի ղեկավարին մինչեւ վերջերս սպասարկում էր սպիտակ Nissan Patrol ամենագնացը, որը համեմատաբար լավ վիճակում էր, բայց Արարատ Միրզոյանը, տեղափոխվելով ԱԳՆ, խնդրել է ՊՊԾ-ին, որ այդ մեքենան փոխանցեն ԱԳՆ-ին, և ԱԺ աշխատակազմի ղեկավարը մնացել է առաց մեքենայի: Սակայն 3 հատ RAV4-երի գնման գործարքն առաջիկայում դժվար թե իրականանա, քանզի «Տոյոտա Երեւան» ընկերության ավտոսրահում մեքենա չկա` ներկրումները ռուս-ուկրաինական պատերազմի պատճառով դադարել են, և հայտնի չէ, թե երբ կբերեն»:

Հայաստանի և Թուրքիայի հատուկ ներկայացուցիչների հաջորդ հանդիպումը կարող է տեղի ունենալ Վիեննայում, «Արմենպրես»-ի հարցին ի պատասխան այս մասին հայտնել է ՀՀ ԱԳՆ մամուլի քարտուղար Վահան Հունանյանը։ ԱԳՆ մամուլի քարտուղարը մեկնաբանել է նաև Թուրքիայի արտաքին գործերի նախարարի հայտարարությունները հանդիպումը Հայաստանում կամ Թուրքիայում անցկացնելու ցանկության և համարձակ քայլերի անհրաժեշտության վերաբերյալ։ ԱԳՆ մամուլի քարտուղարը հայտնել է, որ Հայաստանը Թուրքիային առաջարկել է բացել ցամաքային սահմանը դիվանագիտական անձնագրեր կրող անձանց համար, սակայն թուրքական կողմը հապաղում է։ Հարց․ Որտե՞ղ և երբ է նախատեսվում Հայաստանի ու Թուրքիայի հատուկ ներկայացուցիչների հաջորդ հանդիպումը: Պատասխան․ Կողմերի միջև կա նախնական ըմբռնում, որ հաջորդ հանդիպումը կարող է տեղի ունենալ Վիեննայում։ Հանդիպման ժամկետի և վայրի վերջնական հաստատման պես հանրությունը պատշաճ կերպով կտեղեկացվի։ Հարց․ Թուրքիայի ԱԳ նախարարն իր հարցազրույցում նշել է, թե իրենք կցանկանային, որ հանդիպումը լիներ Հայաստանում կամ Թուրքիայում: Ի՞նչ դիրքորոշում ունի հայկական կողմն այս առումով: Պատասխան․ Կարգավորման նախորդ փորձերի ժամանակ հանդիպումներ Հայաստանում և Թուրքիայում եղել են՝ թե՛ բանակցողների, թե՛ նույնիսկ նախագահների մակարդակով, բայց, ինչպես գիտեք, դրանք արդյունքի չեն հանգեցրել: Նկատի ունեմ՝ կարևորը կարգավորման հասնելու քաղաքական կամքն է և հստակ՝ առարկայական քայլերի գնալու պատրաստակամությունը: Մենք ցուցաբերում ենք երկուսն էլ, և նույնն ակնկալում ենք Թուրքիայից: Եթե կամքը լինի, հանդիպումների վայրը կդառնա զուտ տեխնիկական հարց։ Ավելին, հատուկ ներկայացուցիչների՝ Հայաստանում և Թուրքիայում հանդիպումներ ունենալու առաջարկը վկայում է, որ Թուրքիայի ընկալմամբ՝ գործընթացն ամբողջությամբ երկկողմ բնույթ ունի։ Այս պարագայում տրամաբանական կլիներ, որ Թուրքիայի ներկայացուցիչներից չլսեինք գրեթե ամենշաբաթյա հայտարարություններ այն մասին, թե իրենք գործընթացն առաջ են մղում Ադրբեջանի հետ համակարգմամբ։ Հարց․ Նախարար Չավուշօղլուն Հայաստան-Թուրքիա հարաբերությունների կարգավորման վերաբերյալ խոսելիս նշել է նաև համարձակ քայլերի անհրաժեշտության մասին: Ինչպե՞ս կմեկնաբանեք դա: Պատասխան․ Հայկական կողմը լիովին համամիտ է համարձակ քայլեր կատարելու անհրաժեշտության հետ։ Մենք բազմիցս ցույց ենք տվել առաջ շարժվելու պատրաստակամությունը, այդ թվում՝ Անթալիայի դիվանգիտական ֆորումին ԱԳ նախարարի մասնակցությամբ, տնտեսական էմբարգոյի վերացմամբ: Հայաստանի ու Թուրքիայի միջև ավիաչվերթների վերականգնումը նույնպես երկկողմ կարևոր քայլ էր: Համոզված ենք, որ առաջ շարժվելու միակ ճանապարհը ենթադրում է շարունակական հստակ քայլեր։ Օրինակ՝ մենք թուրքական կողմին առաջարկել ենք առաջին փուլով բացել ցամաքային սահմանը դիվանագիտական անձնագրեր կրող անձանց համար, սակայն թուրքական կողմը հապաղում է: Կարծում ենք՝ սա փոքր, բայց առարկայական, կարևորը՝ տրամաբանական քայլ կլինի: Հույս ունենք՝ հնարավոր կլինի այս հարցում հասնել արդյունքի: