Պուտինը երկօրյա այցով ժամանել Է Պեկին

ՌԴ նախագահ Վլադիմիր Պուտինը ժամանել է Չինաստան, հայտնում է ՏԱՍՍ-ի թղթակիցը։

Ռուսաստանի առաջնորդը Պեկինում կգտնվի մայիսի 19-ին և 20-ին. նրա աշխատանքային գրաֆիկը բավականին հագեցած է։ Ինչպես ավելի վաղ նշել էր միջազգային հարցերով նրա օգնական Յուրի Ուշակովը, առաջիկա այցի կարևորագույն միջոցառումը լինելու է ՉԺՀ նախագահ Սի Ցզինփինի հետ «թեյի սեղանի շուրջ» միջազգային ամենաարդիական խնդիրների քննարկումը։

Նեղ շրջանակում թեյախմությանը նախորդելու են ռուս-չինական բանակցությունները՝ պատվիրակությունների մասնակցությամբ, հանդիպումը ՉԺՀ Պետական խորհրդի վարչապետ Լի Ցյանի հետ, կրթության փոխանակման տարիների բացումը, երկու երկրների հարաբերությունների պատմության մասին ՏԱՍՍ-ի և «Սինհուայի» համատեղ ցուցահանդեսի դիտումը, ինչպես նաև հանդիպումը երիտասարդ չինացի ինժեներ Պեյ Պայի հետ և արարողակարգային այլ միջոցառումներ։

«Շոուդու» օդանավակայանում Պուտինին դիմավորել են որպես թանկագին հյուրի։ Ի պատիվ նրա՝ բարձրացվել են Ռուսաստանի և Չինաստանի պետական դրոշները, կանգնեցվել է պատվո պահակախումբ, ինչպես նաև չինացի դպրոցականների և ուսանողների ողջույնի խումբ։ Ինքնաթիռի սանդուղքի մոտ Ռուսաստանի առաջնորդին դիմավորել են Չինաստանի Կոմունիստական կուսակցության Կենտրոնական կոմիտեի արտաքին գործերի հանձնաժողովի գրասենյակի ղեկավար, ՉԺՀ արտաքին գործերի նախարար Վան Ին, որի հետ ՌԴ նախագահը կարճ զրուցել է կարմիր գորգի վրա, Մոսկվայում ՉԺՀ դեսպան Չժան Հանհուեյը, Չինաստանում Ռուսաստանի դեսպան Իգոր Մորգուլովը և ռուսական արտասահմանյան հաստատությունների ավագ դիվանագիտական աշխատակիցները։ Պուտինը ձեռքսեղմումներով ողջունել է դիմավորողներին։ Երբ Ռուսաստանի նախագահը սանդուղքից քայլել է կարմիր գորգով, երեխաներն ու ուսանողները թափահարել են ռուսական և չինական դրոշակները՝ չինարեն վանկարկելով. «Բարի գալուստ»։

Ողջույնի կարճ արարողության ավարտից հետո Պուտինը նստել է նախագահական Aurus-ը և մեկնել իրեն տրամադրված պետական նստավայր։ Ռուսական համարանիշներով իր մեքենայով պետության ղեկավարը սովորաբար տեղաշարժվում է բոլոր ուղևորությունների ժամանակ, այդ թվում՝ արտասահմանյան։ Այս անգամ նույնպես այդպես է եղել. նախագահական լիմուզինը հատուկ բերվել է Ռուսաստանից, սակայն համարանիշները փոխարինվել են չինականով։ Սև գույնը նշանակում է դիվանագիտական համարանիշներ։