ԱՄՆ-ը և Իրանը մոտ են հրադադարի երկարաձգման համաձայնագրին. ԶԼՄ-ներ

Իրանի շուրջ հակամարտության կարգավորման միջնորդները կարծում են, որ մոտ են ԱՄՆ-ի և Թեհրանի միջև զինադադարը 60 օրով երկարաձգելու մասին համաձայնությանը, գրում է բրիտանական Financial Times թերթը՝ հղում անելով բանակցությունների ընթացքին քաջատեղյակ աղբյուրներին։

ԱՄՆ պետքարտուղար Մարկո Ռուբիոն շաբաթ օրը հայտարարել է Իրանի հարցով առաջընթացի մասին և թույլ տվել, որ մոտ ապագայում նորություններ կարող են լինել։

«Միջնորդները կարծում են, որ մոտ են ԱՄՆ-ի և Իրանի միջև զինադադարը 60 օրով երկարաձգելու և Իսլամական Հանրապետության միջուկային ծրագրի քննարկման համար հիմք ստեղծելու մասին համաձայնությանը», - ասված է հրապարակման մեջ։

Աղբյուրների փոխանցմամբ՝ հնարավոր համաձայնագիրը կներառի պայմանավորվածություն Հորմուզի նեղուցի աշխատանքի աստիճանական վերականգնման և Իրանի՝ բարձր հարստացված ուրանի պաշարները նոսրացնելու կամ փոխանցելու շուրջ բանակցելու պարտավորության մասին: ԱՄՆ-ն պոտենցիալ գործարքի շրջանակներում իբր կարող է թուլացնել իրանական նավահանգիստների շրջափակումը, համաձայնել պատժամիջոցների մեղմացմանը, ինչպես նաև արտերկրում պահվող Թեհրանի ակտիվների փուլային ապասառեցմանը։

ԱՄՆ-ն և Իսրայելը փետրվարի 28-ին սկսեցին հարվածներ հասցնել Իրանի տարածքում գտնվող օբյեկտներին, ագրեսիայի զոհ դարձավ ավելի քան 3 հազար մարդ։ Վաշինգտոնը և Թեհրանը ապրիլի 8-ին հայտարարեցին հրադադարի մասին։ Դրանից հետո Իսլամաբադում անցկացված բանակցություններն ավարտվեցին առանց արդյունքի, ընդ որում, մարտական գործողությունների վերսկսման մասին չէր հաղորդվում, սակայն Միացյալ Նահանգները սկսեցին իրանական նավահանգիստների շրջափակումը։