Դատարանը գտել է, որ Ռամիլ Սաֆարովի հետ նույնականացնելը հայ մարդու համար նվաստացուցիչ է. Սեդա և Ստյոպա Սաֆարյանները դատարանում հաղթել են

ՍԴ դատավոր Սեդա Սաֆարյանն ու նրա եղբայրը՝ Ստյոպա Սաֆարյանը դատական հայց են ներկայացրել քաղաքացիական դատարան՝ վիրավորանքի համար դրամական փոխհատուցում ու ներողություն պահանջելով: Սեդա և Ստյոպա Սաֆարյանները վիրավորանք են համարել այն, որ քաղաքացին իրենց «Սաֆարյան» ազգանվան փոխարեն օգտագործել է «Սաֆարով» ազգանունը: Դատարանը այս հարցի վերաբերյալ հետևյալ իրավական դիրքորոշմանն է եկել.

«Դիմումում Սեդա Սաֆարյանի անունը գրառված է բացառապես «Սաֆարով», այնուհետև նշված է, որ «Սեդա Սաֆարովը՝ Ռամիլ Սաֆարովի քույրն է», «նրա հայրը՝ Ռամիլ Սաֆարովը»։ 

Դատարանի գնահատմամբ հայցվորի կողմից առանձին դիտարկված վերը նշված երեք արտահայտությունները պետք է դիտարկել մեկ միասնական դիտավորության մեջ, քանի որ դրանցով պատասխանողը «Սաֆարյան» ազգանունը «Սաֆարով» խեղաթյուրելով՝ փորձել է հայցվորի ազգանվան վերջավորության փոփոխության միջոցով հայցվորին նույնացնել և վերագրել ազգակցական կապ հայ սպա Գուրգեն Մարգարյանին կացնահարելով սպանած ադրբեջանցու հետ, որը Դատարանի գնահատմամբ միանշանակ նվաստացնում, նսեմացնում է անձի և հայ մարդու պատիվը և արժանապատվությունը»: 

Նման իրավական դիրքորոշմանն է եկել դատավոր Ս. Իսկանդարյանը: