Եզրաս արքեպիսկոպոս Ներսիսյանը շնորհավորել է Սամվել Կարապետյանին 60-ամյակի կապակցությամբ

Հայ Առաքելական եկեղեցու Ռուսաստանի և Նոր Նախիջևանի թեմի առաջնորդ Տ. Եզրաս արքեպիսկոպոս Ներսիսյանը թեմական խորհրդի անդամների և հավատացյալ հոտի անունից շնորհավորել է ազգային բարերար Սամվել Կարապետյանին 60-ամյակի կապակցությամբ։

«Ցավում եմ, որ այսօր հնարավորություն չունեմ գրկելու Ձեզ՝ ինձ անչափ սիրելի մարդուն, Ձեր ծննդյան 60-ամյակի կապակցությամբ, բայց իմ սրտի ամենաջերմ զգացմունքները լցնում են հոգիս և մղում ինձ արտահայտելու շնորհավորական խոսքեր Ձեր հոբելյանի առթիվ։

Սիրելի՛ Սամվել Սարգսի: Ամենից առաջ Ամենակարող Աստծուն աղոթք եմ բարձրացնում Ձեր առողջության, անվտանգության և անարդար, չարամիտ դատապարտությունից շուտափույթ ազատվելու համար։ Այս աղոթքը ելնում է ոչ միայն բոլոր այն իսկական հայերի հոգուց, որոնք շնորհակալ են Ձեզ ազգային և հոգևոր արժեքների պահպանման և մեր Մայր Հայաստանի բարգավաճման գործում ունեցած Ձեր զգալի ներդրման համար։ Այսօր այն աշխարհի տարբեր կողմերում արտասանում են հազարավոր անաչառ մարդիկ, որոնք դավանում են արդարությունն ու աստվածատուր ճշմարտությանը ծառայելը։ Երբ Հերովդես թագավորը Պետրոս առաքյալին բանտ նետեց, «եկեղեցին անդադար աղոթում էր Աստծուն նրա համար» (Գործք 12:5), և ժողովրդական աղոթքի զորությամբ հրեշտակն ազատություն տվեց առաքյալին, գրում է Ավետարանիչ Ղուկասը։

Իր ընտրյալներին դժբախտություններ ուղարկելով՝ Ամենակարող Տերը ոչ միայն զորություն է տալիս մեզ՝ հասնելու իրեն, այլև առաջին հերթին փորձության է ենթարկում նրանց, ում ձեռքով սև գործեր են կատարվում։ Մենք անսասան ենք մեր սիրո մեջ առ Աստված, Հայրենիք, Եկեղեցի, ժողովուրդ և վճռականորեն դատապարտում ենք արդարների հետապնդումը ակնհայտ անձնական դրդապատճառներով։ Մենք Հայաստանի իշխանություններին կոչ ենք անում խելքի գալ և անհապաղ դադարեցնել իրենց հակասահմանադրական, վրեժխնդրության վրա հիմնված գործունեությունը։ Ազգային սրբություններին հավատարիմ լինելու և Եկեղեցուն նվիրվածության համար անձի քրեական հետապնդումն անթաքույթ կամայականություն է։

Դուք, սիրելի՛ Սամվել Սարգսի, որպես իսկական քրիստոնյա, եղել և մնում եք բարեգործության խորհրդանիշ, հայրենասիրության օրինակ, ազգի պատվի պահապան, ինչի վկայությունն են Ձեր աստվածահաճո գործերը։ Ձեր անձնուրաց և բազմակողմանի գործունեությունը Ձեր հավատքի և ուժեղ ոգու ամրության վկայությունն է։ Որպես այն ընտրյալներից մեկը, ով իր ծառայության համար արժանացել է մեր Սուրբ Մայր Եկեղեցու բարձրագույն պարգևին, վստահ եղեք, որ Ռուսաստանի և Նոր Նախիջևանի թեմը միշտ Ձեր կողքին է և անդադար պայքարում է Ձեր ազատության, արդարության հաղթանակի համար։ Աղոթում ենք Ձեզ համար, քանի որ չկա մի ուժ, որը կարող է հաղթել համընդհանուր աղոթքին, ըստ Պողոս առաքյալի խոսքի. «Հույսով ուրախացեք, նեղության համբերեցեք, աղոթքում հարատևեցեք նեղությունների մեջ, մնացե՛ք անդադար աղոթքի մեջ» (Հռոմ. 12:12)։

Մեր Տեր Հիսուս Քրիստոսը թող զորություն տա Ձեզ հաղթահարելու ժամանակավոր դժվարությունները և պարգևի Ձեզ անմռմուռ ուրախություն՝ զորություն տալով աստվածահաճո գործեր իրականացնելու համար։ Եղե՛ք առողջ, և Տիրոջ Աջը թող մնա Ձեր և Ձեր հարազատների վրա»,- ասվում է ուղերձում։