Լրահոս

Գիշերօթիկները փակելու՝ կառավարության սկանդալային որոշման ֆոնին ու ձմռանն ընդառաջ անելանելի վիճակ է նաև ամենահին մանկատներից մեկում: Թռչունյան մասնավոր մանկատան բնակիչների երազանքներն արդեն անթև են: 80 երեխայի ուշքն ու միտքը հիմա միայն այն է, որ ամերիկահայ համայնքի դադարեցրած ֆինանսավորումը վերականգնվի, թե չէ իրենք ու՞ր են գնալու: Միևնույն ժամանակ՝ վարկած կա, որ բարերաները որոշել են փակել մանկատունը, քանի որ այնտեղ երեխաներին ոչ լավ կերակրում, ոչ էլ նորմալ խնամում են:

Օրենքով գողերի մասին խոսելիս Արսեն Բաբայանին հանկարծ հիշելը իհարկե շատ տարօրինակ է, հատկապես, որ հենց այսօր է վերաքննիչ դատարանն արձանագրել, որ Ազգային ժողովի աշխատակազմի ղեկավարի նախկին տեղակալի իրավունքները Երևանի առաջին ատյանի դատարանում խախտվել են նրա հանդեպ կալանավորումը որպես խափանման միջոց ընտրելու որոշման դեմ փաստաբանների ներկայացրած բողոքը քննելիս: Վերաքննիչը հիմնավոր է համարել պաշտպանության կողմի ներկայացրած գրեթե բոլոր փաստարկները:

Մի քանի նորություն՝ սմարթֆոնների ու ինտերնետի սիրահարների համար:

Նոր դժգոհության ալիք է բարձրացել Գյումրիում: Բողոքում են հարավկովկասյան երկաթուղու լոկոմոտիվային դեպոյի աշխատակիցները: 30-ից ավելի մեքենավարներ պնդում են, որ երեկ դեպոյի ղեկավարությունն իրենց հարկադրաբար հանգստի է ուղարկել, իսկ փոխարենն աշխատանքի է ընդունել ռուս մեքենավարների: Ընկերությունը հերքում է այս լուրերը:

Օրերը ցրտել են, բայց մերձիշխանական շրջանակների այն կանխատեսումը, թե ցրտի հետ ցույցերը կցրվեն մնացել են կախված սառը օդում: Նախարար Արայիկ Հարությունյանի հրաժարականի պահանջը շարունակում է սրվել, դասադուլ ու նստացույց հայտարարած ուսանողների շարքերը գնալով խտանում են: Այսօր նրանց են միացել նաև Հյուսիսային համալսարանի ուսանողները: Ինքն իր վիճակն ավելի է բադացրել հենց Արայիկ Հարությունյանը: Նա դասախոսների հետ հանդիպման ժամանակ լուծումներ փնտրելու փոխարեն նորից է սպառնացել ցույցերի առաջամարտիկ դաշնակցականներին արկղերով քրեական գործեր ուղարկել:

Խորհրդարանի ընդդիմադիր թևը դեռ չգիտի՝ ինչ անել ուսանողների նախարարի պաշտոնանկության գործընթաց սկսելու պահանջի հետ: Արայիկ Հարությունյանի գործողությունների մասին հրապարակային դժգոհություն դեռ միայն ԲՀԿ-ականներից ենք լսել, բայց նրանք որևէ բան անել չեն կարող, քանի դեռ Գագիկ Ծառուկյանը չի վերադարձել Մոսկվայից:

Խորհրդարանում շարունակում են բուռն քննարկել առաջին ընթերցմամբ ընդունած օրենքի նախագիծը, ըստ որի քրեական ենթամշակույթ կրող խմբավորում ստեղծելը կամ ղեկավարելը պատժվելու է ազատազրկմամբ հինգից տասը տարի ժամկետով: 

Այս ձմեռը կանցկացնենք գազի համար նույն սակագինը վճարելով: Այսօր հանրային ծառայությունները կարգավորող հանձնաժողովի նախագահը հայտարարել է, որ սակագինը նույնը կմնա առնվազն մինչև ապրիլ, հաջորդ տարվա համար չի փոխվի ջրի գինը:

ՀՀ հատուկ քննչական ծառայությունում քննվող քրեական գործով ձեռք բերված բավարար ապացույցների համակցության հիման վրա Սյունիքի նախկին մարզպետ Սուրիկ Խաչատրյանը ներգրավվել է որպես մեղադրյալ ՀՀ քրեական օրենսգրքի 309-րդ հոդվածի 1-ին մասով, 38-179-րդ հոդվածի 3-րդ մասի 1-ին կետով և 38-314-րդ հոդվածի 1-ին մասով նախատեսված այն հանցավոր արարքների կատարման համար, որ նա դուրս է եկել իր լիազորությունների շրջանակից, ինչպես նաև, պաշտոնեական դիրքն օգտագործելով և անձանց ապօրինի կարգադրություն տալով, դրդել է կատարել առանձնապես խոշոր չափերի վատնում ու պաշտոնեական կեղծիք, ինչի հետևանքով էական վնաս է պատճառել պետության օրինական շահերին:

ԿԳՄՍ նախարար Արայիկ Հարությունյանն իր նեղ շրջապատում հայտարարել է, որ բոլոր այն ուսանողները, որոնք արդեն երկու շաբաթից ավել է դասապրոցեսին, միջանկյալ քննություններին չեն մասնակցում, հետին պլան են մղում կրթական ծրագրով նախատեսված դասաժամերը, չեն ավարտելու համալսարանը: Ավելի կոնկրետ՝ նույն կուրսում են մնալու:

Նվազագույն աշխատավարձի 13 հազար դրամ բարձրացում նախատեսող օրինագծի ընդունումից հետո, այսօր խորհրդարանը սկսել է քննարկել աշխատանքային օրենսգրքում փոփոխություն անելու ԲՀԿ-ական Գեւորգ Պետրոսյանի նախաձեռնությունը: Իմ քայլական պատգամավորները գովել են Պետրոսյանին, ասել՝՝ նորմալ օրինագիծ է բերել վերջապես:

Հայաստանի ֆուտբոլի հավաքականը իր պատմության ամենախոշոր հաշվով պարտությունն է կրել: Երեկ, Իտալական Պալերմո քաղաքի Ռենցո Բարբերա մարզադաշտում մեր ֆուտբոլի ազգային հավաքականը պարտվել է իտալացի ֆուտբոլիստներին 9:1 հաշվով: Սոցցանցերում դժգոհ երկրպագուները առաջին հերթին մեղադրում են գլխավոր մարզչին, որը, ի դեպ, նոր է նշանակվել այդ պաշտոնում: Ֆեդերացիայի գործկոմի անդամն էլ, որ որպես թիվ 1 մեղավոր ֆեդերացիայի նախագահ Արթուր Վանեցյանին է ակնարկել:

Ինչպես է ստացվել, որ ըստ երկրի վարչապետի աշխատատեղերն ավելացել են, իսկ Զինծառայողների ապահովագրության կամ ինչպես ասում են 1000 դրամների հիմնադրամում դա ոչ մի կերպ չեն տեսնում: Մոտ 800 մլն-ի առեղծվածային անհետացման մասին, այս հիմնադրամի հոգաբարձուների խորհրդի անդամները ահազանգում են արդեն մի քանի ամիս, բայց միայն մի քանի օր առաջ են պարզաբանում ստացել կառավարությունից: Թե ինչ են ասել խորհրդի անդամ, պատգամավոր Տիգրան Ուլիխանյանն է հանրայնացրել: