ԱՄԷ-ն 550 մլն ԱՄՆ դոլար կնվիրաբերի ՄԱԿ-ի 2026 թվականի գլոբալ մարդասիրական արձագանքման ծրագրին

Արաբական Միացյալ Էմիրությունների նախագահ Ն․Մ․ Շեյխ Մուհամմադ բն Զայեդ Ալ Նահյանի հանձնարարականի համաձայն՝ ԱՄԷ-ն հայտարարել է ՄԱԿ-ի գլոբալ մարդասիրական արձագանքման ծրագրին (GHO) աջակցելու համար 550 միլիոն ԱՄՆ դոլար նվիրաբերելու մասին։ 

«Արմենպրես»–ի փոխանցմամբ՝ ԱՄԷ–ի WAM լրատվական գործակալության հրապարակման մեջ նշվում է, որ ՄԱԿ-ի այս ծրագիրը նպատակ ունի 2026 թվականին հավաքագրել 33 միլիարդ ԱՄՆ դոլար՝ աջակցելու շուրջ 135 միլիոն մարդու աշխարհի 23 հումանիտար գործողություններում, որոնցում ներառված են նաև  փախստականներին և միգրանտներին աջակցող ծրագրերը։ Ընդ որում, ամենահրատապ առաջնահերթություն է հանդիսանում  անհապաղ օգնության կարիք ունեցող 87 միլիոն մարդկանց փրկելը, ինչի համար պահանջվում է 23 միլիարդ ԱՄՆ դոլարի ֆինանսավորում։

«Այս նախաձեռնությունը վերահաստատում է ԱՄԷ-ի անշեղ հանձնառությունը՝ ուղղված կյանքեր փրկելու և աշխարհի խոցելի բնակչության վրա ազդող աղետներին ու ճգնաժամերին արձագանքելու միջազգային ջանքերի առաջխաղացմանը։

Աջակցությունն արտացոլում է ԱՄԷ-ի կարևոր դերը բազմակողմ հումանիտար գործողությունների խթանման գործում՝ ընդգծելով երկրի սերտ համագործակցությունը ՄԱԿ-ի գործակալությունների, այդ թվում՝ ՄԱԿ-ի մարդասիրական գործերի համակարգման գրասենյակի (OCHA) և տեղում գործող օգնության և զարգացման ծրագրերի հետ, ինչպես նաև ապահովելով օժանդակության արագ և արդյունավետ տրամադրումը կարիքավորներին՝ համաձայն ԱՄԷ նախագահի համապատասխան հրահանգների»,– ասված է գործակալության հրապարակման մեջ։ 

Այս կապակցությամբ, ԱՄԷ Միջազգային համագործակցության պետնախարար Ռիմ բինթ Իբրահիմ Ալ Հաշեմին ասել է. 

«ԱՄԷ-ն շարունակում է համաշխարհային մարդասիրական ջանքերին աջակցելու և ՄԱԿ-ի գործընկերների հետ համագործակցելու իր անսասան հանձնառությունը՝ օգնությունն ուղղելով ամենաշատ վնաս կրածներին։ Այս պարտավորությունն արտացոլում է Ն․Մ․ Շեյխ Մուհամմադ բն Զայեդ Ալ Նահյանի հրահանգները և մեր խորը համոզմունքն առ այն, որ միջազգային համերաշխությունը վճռորոշ դեր է կատարում անհապաղ հումանիտար կոչերին արդյունավետ ու կայուն արձագանքելու, ինչպես նաև մարդկային արժանապատվությունն ու կյանքը պաշտպանելու գործում»։ 

ՄԱԿ-ի գլխավոր քարտուղարի տեղակալ և մարդասիրական գործերի համակարգող Թոմ Ֆլետչերը ողջունել է ԱՄԷ հայտարարությունը՝ նշելով․ 

«Մեր գլոբալ կոչը նպատակ ունի փրկել կյանքեր ամենաշատ տուժած տարածքներում և ծրագրերը վերածել տեղում իրական պաշտպանության: 2026թ․ ծրագրին տրված ԱՄԷ-ի արագ և առատաձեռն աջակցությունը խիստ կարիքավոր մարդկանց ուղղված հզոր ուղերձ է։ Մենք պարտավոր ենք ապահովել ժամանակի հրամայականին համապատասխանող արդյունավետ և նորարարական արձագանք»։

Առողջապահության համաշխարհային կազմակերպության գլխավոր տնօրեն Թեդրոս Ադհանոմ Գեբրեյեսուսի խոսքով՝ առողջապահական համակարգի փլուզման նշանները սովորաբար ի հայտ են գալիս շատ ավելի վաղ, քան  դրա տեղի ունենալը՝  արտահայտվելով հիվանդությունների բռնկումներով, թերսնմամբ և կանխարգելման ենթակա մահացությունների աճով։ 

«Այնուամենայնիվ, համատեղ աշխատանքով մենք կարող ենք վերականգնել առողջապահական ծառայությունները և փրկել կյանքեր։ Ես իմ խորին երախտագիտությունն եմ հայտնում ԱՄԷ նախագահ Ն․Մ․ Շեյխ Մուհամմադ բն Զայեդ Ալ Նահյանին և ԱՄԷ-ին այս աջակցության համար, որը կենսականորեն կարևոր մարդասիրական առողջապահական ծառայություններ կապահովի խիստ կարիքավոր միլիոնավոր մարդկանց համար»,–ընդգծել է նա։

ՅՈՒՆԻՍԵՖ-ի գործադիր տնօրեն Քեթրին Ռասելը նկատել է․

«ՅՈՒՆԻՍԵՖ-ը բարձր է գնահատում ԱՄԷ-ի առատաձեռն աջակցությունը, որը մեծ ազդեցություն կունենա հումանիտար ճգնաժամի պայմաններում հայտնված երեխաների կյանքը փրկելու և բարելավելու վրա»՝ հավելելով, որ ճգնաժամերի ժամանակ երեխաները միշտ ամենախոցելին են, և երբ կարիքները գերազանցում են ֆինանսավորումը, մարդասիրական աշխատանքը հայտնվում է տագնապալից իրավիճակում։ Նա ընդգծել է նաև․ «Ահա թե ինչու ենք մենք այդքան ջանք գործադրում ՅՈՒՆԻՍԵՖ-ի և ԱՄԷ-ի միջև ռազմավարական գործընկերության միջոցով»։ 

ՄԱԿ-ի փախստականների հարցերով գերագույն հանձնակատար Ֆիլիպո Գրանդին ևս ողջունել է հայտարարությունը՝ նշելով. 

«Մենք բարձր ենք գնահատում ԱՄԷ-ի ամուր հանձնառությունը հումանիտար ոլորտում։ Չնայած ծանր ֆինանսական պակասորդին, որոնք լուրջ մարտահրավեր են միլիոնավոր հարկադիր տեղահանվածների համար, ԱՄԷ-ի կառավարությանը նման կառավարությունների ներդրումները հնարավորություն են տալիս ՄԱԿ-ի ՓԽԳՀ-ին բարելավել իր արձագանքման հնարավորությունները և հույս ներշնչել ամենախոցելիներին»։

ՄԱԿ-ի Պարենի համաշխարհային ծրագրի ղեկավար Սինդի Մաքքեյնն ասել է․

 «Մարդասիրական կարիքների աճի և ռեսուրսների վտանգավոր կրճատման պայմաններում ԱՄԷ-ի կողմից տրված առատաձեռն աջակցությունը կենսական նշանակություն ունի, որը կօգնի ապահովել օգնության տրամադրումը դրանց կարիքն ամենաշատը ունեցողներին։ Մենք երախտապարտ ենք ԱՄԷ-ին այս աննախադեպ ժամանակներում ցուցաբերած առաջնորդության համար։ ՊՀԾ-ն պատրաստ է համագործակցել ԱՄԷ-ի հետ՝ ապահովելու այս անհրաժեշտ աջակցության մատակարարումը ամբողջ աշխարհում սուր պարենային պակասի առջև կանգնած միլիոնավոր մարդկանց»։ 

Հրապարակման մեջ շեշտվում է, որ այս աջակցությունն ամրապնդում է ԱՄԷ-ի և ՄԱԿ-ի մարդասիրական համակարգի միջև առկա ուժեղ ռազմավարական գործընկերությունը և վերահաստատում ԱՄԷ-ի կենտրոնական դերը՝ դիմակայելու համաշխարհային ամենահրատապ հումանիտար մարտահրավերներին, ամրապնդելու միջազգային հանրությանը պաշտպանելու կարողությունը, ինչպես նաև ապահովելու կայունություն  ճգնաժամից տուժած տարածքներում։