Մենք շատ հարցեր կարող ենք ունենալ, օրինակ, ինչու ԱԱԾ ղեկավարն այդ օրը ԱԺ-ում չի եղել. Ալեն Սիմոնյանը «հոկտեմբերի 27-ի» մասին

ՀՀ ԱԺ նախագահ Ալեն Սիմոնյանի կարծիքով՝ հոկտեմբերի 27-ի հիմնական պատճառները, հիմնական մասնակիցներն ու այն հարցերը, որ բաց են մնացել, հանրությունը գիտի, գրում է aysor.am-ը:

Սիմոնյանը նշել է, թե այսօր էլ վտանգներ տեսնում է: Ինչ վերաբերում է մեղավորներին պատժելուն՝ նա ասաց, թե ինքը պաշտոնյա է ու իրավունք չունի որևիցե հայտարարություն անել, որը կարող է իր մեջ մեղադրանք պարունակել ու հետագայում կարող է ազդել իրավական պրոցեսների վրա:

Հարցին՝ Մեղրիի փոխանակման հետ կապ ունե՞ր հոկտեմբերի 27-ի ոճրագործությունը, Սիմոնյանն արձագանքեց. «Չեմ բացառում, իմ կարծիքն է, ես չեմ բացառում, որ այն իրավիճակը, որ մենք ունենք՝ պատերազմի հետ կապված, սկսվել է հենց հոկտեմբերի 27-ին, որովհետև, եթե չլիներ հոկտեմբերի 27, մենք այսօրվան չէինք գա»:

Ալեն Սիմոնյանը վստահեցրել է՝ ամեն ինչ անելու են, որ հոկտեմբերի 27-ի պատվիրատուները հայտնվեն ճաղերի հետևում:

«Դրա մեջ, կարծում եմ, որևիցե մեկը պետք է կասկած չունենա»,-ասել է ԱԺ նախագահը:

Ալեն Սիմոնյանի խոսքով՝ այսօրվա ընդդիմությունը պետք է հնարավորինս քիչ խոսի հոկտեմբերի 27-ի մասին, որովհետև այն տեղի է ունեցել նրանց իշխանության օրոք:

«Թե հանրությունը, թե մենք շատ ու շատ հարցեր կարող ենք ունենալ, օրինակ, ինչու ԱԱԾ ղեկավարն այդ օրը Ազգային ժողովում չի եղել, հարցերի մեծ շարան կարող ենք ներկայացնել»,-ասել է նա: