Մայիսի 9-ի հիշատակը Բելառուսի և Ռուսաստանի դաշնակցային հարաբերությունների հիմքն է. Լուկաշենկո

Բելառուսի նախագահ Ալեքսանդր Լուկաշենկոն, շնորհավորական ուղերձ հղելով Ռուսաստանի առաջնորդ Վլադիմիր Պուտինին Հաղթանակի օրվա առթիվ, նշել է, որ Հայրենական մեծ պատերազմի մասին հիշատակը ծառայում է որպես երկու երկրների փոխվստահության և իսկական դաշնակցության ամուր հիմք:

«Հայրենական մեծ պատերազմի մեկնարկի 85-ամյակի տարում մենք հատկապես սուր ենք գիտակցում Հաղթանակի իրական գինն ու զինվորների ու թիկունքի մշակների սխրանքի վեհությունը։ Նրանց անկոտրում տոկունությունն ու անձնազոհությունը ընդմիշտ կանխորոշեցին մեր եղբայրական ժողովուրդների և ողջ մարդկության ճակատագիրը՝ գալիք սերունդներին պարգևելով ազատության և ստեղծարար աշխատանքի իրավունք։ Այդ դժվարին տարիների հիշողությունը Բելառուսի և Ռուսաստանի հոգևոր ու պատմական ժառանգության անբաժանելի մասն է։ Հենց այդ պատճառով էլ գտնում եմ, որ Միութենական պետությունը կոչված է լինելու այն գործընթացների առաջնագծում, որոնք ուղղված են մոլորակի վրա անվտանգության ներկայիս գլոբալ ճգնաժամի հաղթահարմանը», - նշված է ուղերձում։

Բացի այդ, Լուկաշենկոն Հաղթանակի օրվա առթիվ շնորհավորել է ՌԴ բարձրագույն ղեկավարության ներկայացուցիչներին, Մոսկվայի և Համայն Ռուսիո Կիրիլ Պատրիարքին, ինչպես նաև միջազգային և տարածաշրջանային կազմակերպությունների ղեկավարներին։

ԱՊՀ երկրների առաջնորդներին հղած ուղերձներում Բելառուսի նախագահն ընդգծել է, որ մայիսի 9-ի սրբազան ամսաթիվը հավերժ գրված է խորհրդային ժողովուրդների ճակատագրերում։ «Հիշողությունը նրանց մասին, ովքեր անհավանական ջանքերի և սեփական կյանքի գնով մեզ ազատություն պարգևեցին, բարոյական կողմնացույց է և նախազգուշացում՝ անցյալի ողբերգությունների կրկնությունից խուսափելու համար»,- նշել է նա։

Շնորհավորելով Ուկրաինայի ժողովրդին Հաղթանակի տոնի առթիվ՝ հանրապետության ղեկավարը մատնանշել է, որ բելառուսներն ու ուկրաինացիները կողք կողքի են կանգնած եղել սարսափելի փորձությունների ժամանակ։ «Այսօր չափազանց կարևոր է սերունդներին փոխանցել ճշմարտությունը նացիզմի դեմ համատեղ պայքարի մասին։ Բելառուսում հիշում են ուկրաինացի հերոսներին, ովքեր իրենց կյանքը զոհեցին բելառուսական հողի ազատագրման համար։ Պատմությունը վերագրելու և մեր ժողովուրդների միջև անվստահություն սերմանելու ցանկացած փորձ դատապարտված է ձախողման», - պարզաբանել է նա։

Լուկաշենկոն նաև առողջություն ու երկարակեցություն է մաղթել ուկրաինացի վետերաններին, իսկ Ուկրաինայի բնակիչներին՝ խաղաղության և համաձայնության շուտափույթ հաստատում։