Թրամփը պատրաստ է բանակցողներ ուղարկել Մոսկվա. Ուկրաինայում եռօրյա հրադադար է հաստատվել

Միացյալ Նահանգները պատրաստ կլինի իր բանակցողներին նոր այցով ուղարկել Մոսկվա, եթե դա նպաստի Ուկրաինայի հակամարտության կարգավորման գործընթացին: Այս մասին Սպիտակ տանը լրագրողների հետ զրույցում հայտարարել է ԱՄՆ նախագահ Դոնալդ Թրամփը՝ պատասխանելով ՏԱՍՍ-ի հարցին:

«Այո՛, ես կանեի դա: Եթե որոշեմ, որ դա կօգնի, ես կանեմ դա», - նշել է ԱՄՆ վարչակազմի ղեկավարը՝ մեկնաբանելով հարցը, թե արդյոք նա իր թիմին կուղարկի Մոսկվա հետագա բանակցությունների համար՝ հաշվի առնելով մայիսի 9-ին, 10-ին և 11-ին Ուկրաինայում կրակի դադարեցման մասին ձեռք բերված համաձայնությունը:

Թրամփը նաև ենթադրել է, որ գործընթացն իրոք կարող է հանգեցնել ուկրաինական հակամարտության ավարտին. «Ես կցանկանայի տեսնել այս պատերազմի վերջը: Ես հասել եմ ութ պատերազմների ավարտին, իրականում՝ ինը: Եվ հիմա տեղի ունեցողը նման է նրան, որ մենք կարող ենք հասնել նաև տասներորդի ավարտին: Ես շատ կցանկանայի հասնել սրա վերջնակետին, ասեմ ձեզ. կցանկանայի տեսնել Ռուսաստանի և Ուկրաինայի միջև այս պատերազմի ավարտը»:

Ինչպես ավելի վաղ լրագրողներին հայտնել էր Ռուսաստանի նախագահի օգնական Յուրի Ուշակովը, Մոսկվայի և Վաշինգտոնի հեռախոսային շփումները, ինչպես նաև ԱՄՆ-ի փոխգործակցությունը Ուկրաինայի հետ թույլ են տվել համաձայնության գալ մայիսի 9-11-ը զինադադար հաստատելու շուրջ: Կրեմլի ներկայացուցչի խոսքով՝ այս պայմանավորվածությունը դարձել է այն գաղափարների զարգացումը, որոնք հնչել են ապրիլի 29-ին ՌԴ նախագահ Վլադիմիր Պուտինի և Դոնալդ Թրամփի հեռախոսազրույցի ընթացքում:

«Կարևոր է, որ նախագահ Թրամփի նախաձեռնությունը համընկնում է նացիզմի դեմ տարած հաղթանակի 81-րդ տարեդարձին՝ մեր սուրբ տոնին», - ընդգծել է Ուշակովը: