Նեթանյահուն կարող է մեկնել ԱՄՆ՝ սենատոր Գրեմի հուղարկավորությանը մասնակցելու համար. ԶԼՄ

Իսրայելի վարչապետ Բենյամին Նեթանյահուն դիտարկում է ԱՄՆ մեկնելու հնարավորությունը՝ հանգուցյալ սենատոր Լինդսի Գրեմի հրաժեշտի արարողությանը մասնակցելու համար։ Այս մասին հայտնել է «The Times of Israel» թերթը՝ հղում անելով կառավարության ղեկավարի գրասենյակի աղբյուրին։

Գրեմի հուղարկավորության օրը դեռևս հրապարակված չէ։

Ինչպես նշում է պարբերականը, քիչ առաջ Նեթանյահուն Սպիտակ տան հետ արդեն քննարկել էր «առաջիկա շաբաթներին» ԱՄՆ նախագահ Դոնալդ Թրամփի հետ հանդիպում կազմակերպելու հնարավորությունը։

Ավելի վաղ Նեթանյահուն ցավակցություն էր հայտնել Գրեմի մահվան կապակցությամբ՝ նրան անվանելով Իսրայելի «լավագույն ընկերներից մեկը»։ Իսրայելական կողմից ցավակցական խոսքեր են հղել նաև երկրի նախագահ Իցհակ Հերցոգը և ԱԳ նախարար Գիդեոն Սաարը։ Երկուսն էլ նշել են, որ քաղաքական գործիչը միշտ աջակցել է Իսրայելին։

Հանրապետական սենատոր (Հարավային Կարոլինա նահանգից) Լինդսի Գրեմը հանկարծամահ է եղել հուլիսի 11-ին՝ 71 տարեկան հասակում։ Նա Ռուսաստանի դեմ պատժամիջոցները խստացնելու մասին օրինագծի հիմնական հեղինակներից էր։ Փաստաթուղթը ապրիլի սկզբին ներկայացրել էր ամերիկացի սենատորների երկկուսակցական խումբը։ Օրինագծի հիմնական հեղինակներն էին Գրեմը և Ռիչարդ Բլումենտալը (դեմոկրատ՝ Կոնեկտիկուտ նահանգից)։ Այս նախաձեռնությունը նախատեսում է, ի թիվս այլնի, երկրորդային պատժամիջոցներ ՌԴ-ի առևտրային գործընկերների նկատմամբ։ Սենատորների առաջարկում նշված էին 500% մաքսատուրքեր ԱՄՆ ներմուծվող այն ապրանքների համար, որոնք արտադրվել են Ռուսաստանից նավթ, գազ, ուրան և այլ ապրանքներ գնող երկրներում։ Բացի հակառուսական գործունեությունից, Գրեմն ակտիվորեն աջակցում էր Իսրայելին և հանդես էր գալիս որպես Իրանի դեմ ԱՄՆ ռազմական արշավի գլխավոր կողմնակիցներից մեկը։