Փաշինյանն իր դիրքերն ամրապնդում է դավադիր պառակտիչի ձեռագրով և «Արքա-Արեգակ»-ի սինդրոմով. Լիլիթ Գալստյան

ԱԺ «Հայաստան» խմբակցության պատգամավոր Լիլիթ Գալստյանի հրապարակումը.

«Դու  պետությունը չես․ սևեռումներդ հակապետական են և անառողջ

«Պետությունը ես եմ»,- հայտարարում էր եվրոպական բացարձակ միապետության խորհրդանիշ Լյուդովիկոս XIV-ը (1643–1715թթ․); Նա նաև կարողացել էր իր ժամանակակիցներին ներշնչել, որ ինքն «Արքա-Արեգակ» է և իր իշխանությունը բացարձակ է՝ առանց սահմանափակումների։

Ու թեև Լյուդովիկոս XIV-ից հետո աշխարհը՝ Մոնտեսքյոի, Ռուսոյի պատկերացումների, նաև մի շարք հեղափոխությունների արդյունքում որդեգրեց սահմանադրականության և ժողովրդավարության սկզբունքները, այնուամենայնիվ Լյուդովիկոսը XIV-ը հետագայում շատերի համար մնաց ներշնչանքի աղբյուր։

Զարմանալիորեն, «Պետությունը ես եմ» ախտով վարակվում են հիմնականում հեղափոխական ալիքով իշխանության եկած ու ժողովրդին մեծ խոստումներ տված «առաջնորդները»։

Հայաստանն այս ցավալի շարքում հավակնում է պատվավոր տեղ զբաղեցնել։ Նիկոլ Փաշինյանն իր դիրքերն ամրապնդում է անթաքույց, հաճույքով և ի լուր աշխարհի, դավադիր պառակտիչի ձեռագրով, «Արքա-Արեգակ»-ի սինդրոմով։ Լյուդովիկոսի «պետությունը ես եմ» արտահայտությունը նրա համար պատմական դրվագ չէ, այլ անսահման երևակայության և սեփական ամբիցիաներն ու անզուսպ երևակայությունը հագուրդ տալու աղբյուր։

Երեք միլիոն վարչապետների ուսերին իշխանության եկած Փաշինյանի թելադրանքով ու միանձնյա կամքով այսօր բանտերում քաղաքական բանտարկյալներ ունենք, անհնազանդության համար պաշտոնին հրաժեշտ տված իրավապահ համակարգի ներկայացուցիչներ, ազատ խոսքի և լրագրողների ամենօրյա ահաբեկում, վրեժի, վախի, ազգային պառակտումի ահագնացող մթնոլորտ ու միջազգային նվաստացում․․․

Երեկ հրապարակվեց ՔՊ ծրագիրը, ուր արժեքահեն հանրություն կետի տակ հրապարակվել է Հայաստանյայց Առաքելական Սուրբ Եկեղեցու բարենորոգման օրակարգը և ճանապարհային քարտեզը։

Սա ոչ այլ ինչ է, քան երկրում սահմանադրական կարգը ոտնատակ տալու հերթական հրապարակային խոստովանություն։ Սա ինքնին հանցագործություն է սահմանադրական կարգի դեմ։ Իհարկե, այս և այլ հայտարարությունների համար գալու է պատասխան տալու ժամանակը։

Բայց մինչ այդ, հիշիր՝ դու չունես Հայ Առաքելական եկեղեցին բարենորոգելու սահմանադրական լիազորություն և առհասարակ չես վաստակել սեփական արժեքներդ հայ ժողովրդին պարտադրելու ոչ մի բարոյական իրավունք։

Դու պետությունը չես․ սևեռումներդ անառողջ են ու հակապետական։

Իսկ ո՞ւմ ակնհայտ չէ, որ եկեղեցին «ինքնիշխանության դեմ հիբրիդային պայքարի հենակետ» դիտարկելու հրահանգն էլ Բաքվից ես ստացել։

Մի բան էլ՝ պատմության մեջ պետությունն ուզուրպացրած մի շարք ավտորիտար առաջնորդների՝ Զին Էլ Աբիդին Բեն Ալիի, Մուամմար Քադաֆիի, Իդի Ամինի և ուրիշների վերջը բոլորովին բարի չէր։

Հ․Գ․ Մեր քրիստոնեական հավատը վահան է ամեն տեսակ չարիքի, սատանայության ու վախի։

Օրհնյալ է Քրիստոսի Հրաշափառ Հարությունը»։