Սլովակիայի վարչապետը կարող է ավտոմեքենայով մեկնել Մոսկվա՝ Հաղթանակի օրվա միջոցառումներին․ TVN24

Սլովակիայի վարչապետ Ռոբերտ Ֆիցոն դիտարկում է Հաղթանակի օրվա առթիվ Մոսկվա ավտոմեքենայով մեկնելու տարբերակը, երբ Մերձբալթյան երկրները մերժել են նրա օդանավի թռիչքի թույլտվությունը։ Ինչպես փոխանցում է ՏԱՍՍ-ը, այս մասին, հղում անելով անանուն դիվանագիտական աղբյուրին, հայտնել է TVN24 հեռուստաալիքը։

«Ֆիցոյի՝ ավտոմեքենայով Մոսկվա մեկնելու հարցը քննարկվում է շատ լուրջ և լիովին հավանական է։ Միայն թե Սլովակիայի վարչապետին հաջողվի թռիչքի այլընտրանքային երթուղի գտնել, սակայն Եվրամիության երկրների առաջնորդները նման այցի նկատմամբ խանդավառություն չեն ցուցաբերում»,- նշել է աղբյուրը։ Ընդգծվում է, որ նման դեպքում Բրատիսլավայից չի պահանջվի թույլտվություն խնդրել այն երկրներից, որոնց տարածքով կանցնի Ֆիցոյի պատվիրակության երթուղին։

Նախօրեին Լեհաստանի ԱԳ նախարար Ռադոսլավ Սիկորսկին հայտարարել էր, որ Ֆիցոյի ինքնաթիռի՝ Լեհաստանի օդային տարածքով դեպի Ռուսաստան թռիչքի հարցը հանված է օրակարգից։ Ընդ որում, նա չի պարզաբանել, թե արդյոք Վարշավան պատրաստվում էր թույլտվություն տալ, կամ թե Մոսկվա մեկնելու համար որ երթուղին էր ընտրել Բրատիսլավան։

Ավելի վաղ Սլովակիայի վարչապետը հայտնել էր, որ Լատվիան և Լիտվան թույլ չեն տա իր օդանավին անցնել իրենց տարածքով՝ Հաղթանակի օրվա հանդիսություններին մասնակցելու նպատակով Մոսկվա մեկնելիս։ Նմանատիպ որոշման մասին հայտարարել էր նաև Էստոնիայի ԱԳ նախարար Մարգուս Ցահկնան։ Ֆիցոն հավաստիացրել է, որ այլ երթուղի կգտնվի։ Նույն իրավիճակը ստեղծվել էր նաև անցյալ տարի, երբ Էստոնիան, Լատվիան և Լիտվան հրաժարվել էին բացել օդային տարածքը սլովակյան կողմի համար։ Այն ժամանակ վարչապետի օդանավը Մոսկվա էր հասել ավելի երկար՝ հարավային երթուղով՝ անցնելով Հունգարիայի, Ռումինիայի, Սև ծովի և Վրաստանի տարածքով։