Բրիտանիան ՌԴ-ին դիմակայելու համար Հյուսիսային համատեղ ռազմածովային ուժեր ստեղծելու ծրագիր է մշակել

Մեծ Բրիտանիան Հյուսիսային Եվրոպայի երկրների դաշնակիցների հետ միասին մշակում է նոր ծովային գործընկերության ստեղծման ծրագրեր՝ նպատակ ունենալով դիմակայել Ռուսաստանին։ Ինչպես հայտնում է ՏԱՍՍ-ը, այս մասին հայտարարել է Մեծ Բրիտանիայի առաջին ծովային լորդ (Ռազմածովային ուժերի գլխավոր հրամանատար), գեներալ Գվին Ջենկինսը։

Նրա առաջարկը հիմնված է Միացյալ էքսպեդիցիոն ուժերի (Joint Expeditionary Force, JEF) մոդելի վրա, որոնք գործում են 2014 թվականից՝ Միացյալ Թագավորության հրամանատարության ներքո։ Տարածաշրջանային պաշտպանական միավորումը ներառում է Հյուսիսային Եվրոպայի 10 երկիր՝ Մեծ Բրիտանիան, Դանիան, Իսլանդիան, Լատվիան, Լիտվան, Նիդեռլանդները, Նորվեգիան, Ֆինլանդիան, Շվեդիան և Էստոնիան։

«Մենք համատեղ աշխատում ենք նրա համար, որպեսզի ապահովենք օպերատիվ արձագանքման հնարավորություն Հեռավոր Հյուսիսի, Հյուսիսային Ատլանտիկայի և Բալթիկ ծովի տարածաշրջաններում ի հայտ եկող սպառնալիքներին։ JEF-ը կոչված է լրացնել ՆԱՏՕ-ն, այլ ոչ թե խլել նրա ռեսուրսները», - հայտարարել է Ջենկինսը՝ ելույթ ունենալով Լոնդոնի Անվտանգության և պաշտպանության հարցերի հետազոտությունների միացյալ թագավորական ինստիտուտում (Royal United Services Institute for Defence and Security Studies, RUSI)։
Բրիտանական ռազմածովային ուժերի գլխավոր հրամանատարն իր նպատակն է անվանել այնպիսի ծովային ուժերի ստեղծումը, որոնք «միասին կմարզվեն, կանցկացնեն վարժանքներ և կպատրաստվեն գործողությունների»։ Շնորհիվ այն բանի, որ միավորման բոլոր անդամ երկրները կօգտագործեն ընդհանուր համակարգեր և հարթակներ, միասնական թվային ցանցեր, լոգիստիկա և պաշարներ, դրանցում կապահովվի փոխփոխելիություն՝ դետալների փոխարինման, սպառազինության և անձնակազմի փոխանակման հնարավորություն։ Ինչպես պատմել է Ջենկինսը, դիտարկվում է «դաշնակից նավատորմերի ընտանիքի ստեղծումը», որոնք կապահովեն անհրաժեշտ «ծովային, օդային և դեսանտային հարվածային կարողություններ» Ռուսաստանի Դաշնության հետ ծովային սահմանի երկայնքով։

Նա հայտնել է, որ անցյալ շաբաթ Մեծ Բրիտանիայում տեղի է ունեցել Հյուսիսային Եվրոպայի երկրների ռազմածովային ուժերի գլխավոր հրամանատարների հանդիպումը՝ ծրագրի իրականացումը քննարկելու համար։ «Այդ հանդիպման ժամանակ մենք ստորագրեցինք մտադրությունների հռչակագիր, որտեղ մեր երկրներից յուրաքանչյուրը պարտավորվեց մշակել մանրամասն առաջարկներ Հյուսիսային ռազմածովային ուժերի նախաձեռնության համար»,- պատմել է Ջենկինսը։