ֆոն դեր Լայենի նկատմամբ ստուգումներ են սկսվել Զելենսկու հետ նամակագրության պատճառով․ ԶԼՄ

Եվրոպական օմբուդսմեն Թերեզա Անժինյոն սկսել է ստուգումներ Եվրահանձնաժողովի (ԵՀ) նախագահ Ուրսուլա ֆոն դեր Լայենի նկատմամբ՝ գաղտնի չատի պատճառով, որին մասնակցել են Գերմանիայի կանցլեր Ֆրիդրիխ Մերցը, Ֆրանսիայի նախագահ Էմանուել Մակրոնը, Իտալիայի վարչապետ Ջորջիա Մելոնին, Մեծ Բրիտանիայի վարչապետ Քիր Սթարմերը և Վլադիմիր Զելենսկին։ Ինչպես հայտնում է ՏԱՍՍ-ը, այս մասին գրում է Berliner Zeitung թերթը։

Անժինյոն անցյալ շաբաթ Եվրահանձնաժողովին ծանուցել է ստուգումների մասին։ Նա ուսումնասիրում է, թե արդյոք ԵՀ-ն խախտել է թափանցիկության կանոնները՝ հրաժարվելով նիդերլանդական «Follow the Money» (FTM) կազմակերպությանը տրամադրել մուտք դեպի այդ նամակագրություն։ Եվրահանձնաժողովում մերժումը հիմնավորել են նրանով, որ չատի տվյալների հրապարակումը կարող է «բարդացնել Եվրամիության (և նրա անդամ երկրների) միջազգային հարաբերությունները երրորդ պետությունների հետ»։

«Ես որոշում եմ կայացրել հետաքննություն սկսել Եվրահանձնաժողովի գործողությունների վերաբերյալ՝ կապված դիմողի հարցման հետ, փաստաթղթերին հասարակության հասանելիության մասին ԵՄ նորմատիվային ակտերին համապատասխան», - գրել է Անժինյոն FTM կազմակերպությանը։ Նա ակնկալում է մինչև հուլիսի կեսերը հանդիպել ԵՀ ներկայացուցիչների հետ։