Թրամփը կշտամբել է Մերցին Ուկրաինայի հարցում կարգավորման անարդյունավետության համար

Ամերիկյան վարչակազմի ղեկավար Դոնալդ Թրամփը կշտամբել է Գերմանիայի կանցլեր Ֆրիդրիխ Մերցին ուկրաինական ճգնաժամի կարգավորման հարցում անարդյունավետության համար։ Համապատասխան հրապարակումը նա զետեղել է Truth Social սոցիալական ցանցում։

«Գերմանիայի կանցլերը պետք է ավելի շատ ժամանակ ծախսի Ռուսաստանի և Ուկրաինայի միջև հակամարտությունը դադարեցնելու վրա (որտեղ նա լիովին անարդյունավետ է) և իր քայքայված երկրի վերականգնման վրա՝ հատկապես ներգաղթի ու էներգետիկայի ոլորտներում, և ավելի քիչ ժամանակ հատկացնի նրանց խոչընդոտելուն, ովքեր վերացնում են իրանական միջուկային սպառնալիքը՝ դրանով իսկ աշխարհը, ներառյալ Գերմանիան, դարձնելով ավելի անվտանգ վայր», - գրել է Սպիտակ տան ղեկավարը։

Ավելի վաղ ԱՄՆ նախագահը հայտարարել էր, որ իր վարչակազմը դիտարկում է Գերմանիայում տեղակայված զորակազմի կրճատման հնարավորությունը։ Ամերիկյան առաջնորդը չէր հստակեցրել, թե ինչու կարող է վարչակազմը նման քայլի դիմել, սակայն հայտարարությունը հայտնվել էր այն բանից հետո, երբ Մերցը քննադատաբար էր արտահայտվել Իրանի դեմ Վաշինգտոնի ռազմական արշավի մասին՝ մատնանշելով ԱՄՆ-ի հստակ ռազմավարության բացակայությունը։ Երեքշաբթի օրը Թրամփը մեղադրել էր Մերցին այն բանում, որ նա իբր «ընդունելի է համարում Իրանի մոտ միջուկային զենքի առկայությունը»։