Թրամփը դիտարկում է Կանադայից ներմուծման նկատմամբ նոր մաքսատուրքեր սահմանելու հնարավորությունը

Վաշինգտոնի վարչակազմը դիտարկում է Կանադայից ներկրվող արտադրանքի նկատմամբ լրացուցիչ մաքսատուրքեր սահմանելու հնարավորությունը՝ այդ երկրում տեղի ունեցող անտառային հրդեհների հետևանքով ԱՄՆ-ում օդի աղտոտման պատճառով։ Այդ մասին հայտարարել է ԱՄՆ նախագահ Դոնալդ Թրամփը։

«Մենք դիտարկում ենք այս հարցը։ Հասցվել է լուրջ վնաս։ Նրանք պատշաճ կերպով չեն հսկում իրենց անտառները։ Իսկ քամին, որպես կանոն, փչում է Նյու Յորքի ուղղությամբ», - նշել է ԱՄՆ առաջնորդը՝ խոսելով Կանադայից ապրանքների վրա լրացուցիչ մաքսատուրքեր սահմանելու հնարավորության մասին։ Նա հավելել է, որ ամերիկյան Միչիգան նահանգում ավելի վաղ օդի աղտոտման պատճառով խախտվել էր որոշ ընկերությունների աշխատանքը։

Թրամփը հստակեցրել է, որ ԱՄՆ-ի կողմից հուլիսի 20-ին հայտարարված կանադական արտադրանքի լայն տեսականու վրա 50% չափով լրացուցիչ ներմուծման մաքսատուրքեր մտցնելու որոշումը պատասխան միջոց չէ հիշատակված իրավիճակին: «Ոչ, սա առանձին հարց է։ Մենք դա դիտարկում ենք առանձին», - պարզաբանել է նա։ «Սա պատասխան է միայն այն բանին, թե ինչպես են նրանք վարվել մեր ֆերմերների, մեր մարդկանց հետ», - ասել է Թրամփը Սպիտակ տանը Լիբանանի նախագահ Ժոզեֆ Աունի հետ հանդիպման ժամանակ։

Թրամփը հուլիսի 17-ին սպառնացել էր Կանադային ավելացնել մաքսային տուրքերը՝ անտառային հրդեհների իրավիճակի պատճառով, որոնց ծուխը վերջին օրերին պարբերաբար պատել էր ԱՄՆ-ի մի շարք խոշոր քաղաքներ, այդ թվում՝ Վաշինգտոնը, Նյու Յորքը (Նյու Յորք նահանգ), Դետրոյթը (Միչիգան նահանգ) և Չիկագոն (Իլինոյս նահանգ): Ինչպես նշել էր այդ ժամանակ Թրամփը, Վաշինգտոնի վարչակազմը «Կանադային է պատասխանատու համարում այն փաստի համար, որ նա պատշաճ կերպով չի պահում իր անտառները»: Նրա խոսքով, դրա պատճառով «ԱՄՆ առանց որևէ անհրաժեշտության թափանցում է զզվելի, կեղտոտ և վնասակար օդ»:

Կանադական իշխանությունների վերջին տվյալներով՝ երկրի տարածքում կա մոտ 890 անտառային հրդեհ, որոնցից շուրջ 90-ը դեռևս չի հաջողվում վերցնել հսկողության տակ: